Ótti og mikil reiði í Bláskógarbyggð

Brynjar Dagbjartsson trésmiður, sem varð fyrir fólskulegri árás tveggja lettneskra ríkisborgara þá er þeir voru að brjótast inn í sumarbústað við Reykjaskóg í Bláskógabyggð í fyrrakvöld, segir skelfilega lífsreynslu að lenda í slíkum ofbeldismönnum. Sauma þurfti þrettán spor í andlit Brynjars, auk þess sem hann er rifbeinsbrotinn og skaddaður á öðru lunga. Og Brynjari lýst ekki á blikuna nú þegar þeir hafa verið látnir lausir.

„Ég bara vorkenni lögreglunni. Hún hefur lagt sig fram um að vinna í málinu og fær þetta svo framan í sig af dómara. Eftir því sem menn stela meiru og gera meira af sér fá þeir vægari meðferð. Ef þú stelur samloku, þá ertu settur inn.“

Brynjar lenti í mönnunum og hann óttast um sinn hag: „Ég er 'drullunervus' um að þeir fari að leita mig uppi. Þeir vita að ég er hérna í hverfinu.“

Bústaðaeigendur hafa sett sig í samband við hann og lýst yfir verulegum áhyggjum og hafa farið fram á lögregluvernd fyrir Brynjar. Brynjar segir ótta á svæðinu verulegan og reiði. „Mjög mikil. Það sem ég hef fengið á tölvupósti og á Fésbókinni... maður vill ekki hafa það eftir.“