Meirihluti Hvergerðinga vill sameinast öðru sveitarfélagi

Samhliða sveitarstjórnarkosningunum síðastliðinn laugardag fór fram ráðgefandi skoðanakönnun um sameiningarmál í Hveragerði.

Niðurstöður skoðanakönnunarinnar var sú að 704 eða 63% vildu að Hveragerði myndi sameinast öðru sveitarfélagi en 383 eða 34% sögðu nei. 30 seðlar voru auðir. Þetta kemur fram í fréttatilkynningu frá Hveragerðisbæ.

Þátt tóku 1117 einstaklingar en á kjörskrá voru 1787. Kosningaþátttaka var 62,5 %

Í skoðanakönnuninni gátu þátttakendur valið á milli fimm sameiningarkosta og eru niðurstöður eftirfarandi:

• 69,74% þeirra sem tóku þátt völdu sameiningu Hveragerðis og Ölfuss sem vænlegasta kost.

• 10,94 % völdu sameiningu vesturhluta Árnessýslu (Hveragerði, Flói, Árborg, Ölfus)

• 9,8% völdu Árnessýslu alla

• 3,69% völdu Suðurland í heild sinni

• 2.98% völdu Árnessýslu utan Árborgar

• 14 kusu án þess að tilgreina valkost og 6 einstaklingar völdu fleiri en einn valkost.

Afgerandi niðurstaða liggur því fyrir í skoðanakönnuninni og mun bæjarstjórn taka skoðanakönnunina til afgreiðslu á fyrsta fundi sínum.