Innlent

Afmæli elsta Íslendings landsins

Linda Blöndal skrifar

„Það á að lifa lífinu og teysta guði,” segir Guðríður Guðbrandsdóttir sem í dag heldur upp á 108 ára afmælið.

Guðríður er elst allra Íslendinga. Aðeins fjórir Íslendingar, allt konur, hafa náð svo háum aldri. Stöð tvö heimsótti hana í dag þar sem hún hélt með fjölskyldunni upp á afmælið á heimili tengdadóttur sinnar.

Átta ára í fyrri heimstyrjöldinni
Guðríður var ein af ellefu systkinum, fædd í Dalasýslunni og ólu hún og eiginmaður hennar upp þrjú börn.  Fjölskyldan er stór. Barnabörnin eru 11, barnabarnabörnin 29 og barnabarnabarnabörnin 13 að tölu.  Guðríður flutti þrítug til Reykjavíkur en bjó áður um tíma í Búðardal með eiginmanni sínum sem var skósmiður.

Besta breytingin var að fá rafmagn, segir hún en Guðríður fæddist árið1906 á Heimastjórnartímanum þegar ýmsar framfarir urðu. Til dæmis sendi Hannes Hafstein ráðherra þá fyrsta símskeytið héðan til konungs. Þegar Guðríður var átta ára braust fyrri heimstyrjöldin út. Hún man eftir erfiðleikum og að vegna stríðsins áttu hún ekki neina skó þegar hún fermdist eða almennileg föt.

Hún rifjar líka upp að þegar hún fékk kosningarétt gat hún samt ekki kosið. Þegar hún mætti í fyrsta sinn á kjörstað hafði gleymst að setja hana á kjörskrá og ekkert var úr því bætt.

Best að drekka hvorki né reykja
Það er best að vera jákvæður og ekki drekka áfengi og reykja eða gera nokkuð sem er vont fyrir mann, segir Guðríður þótt hún segist sposk eitt sinn hafa ákveðið að byrja að reykja en einhvern veginn bara hætt við. Spurð að því hvernig sé að ná svo háum aldri þá segist Guðríður helst syrgja vini og kunningja sem fallnir eru frá, einnig systkini sín tíu talsins sem eru dáin og ekki síst börnin sín þrjú sem eru líka öll látin.

Hún segist stundum horfa á fréttir en ekki fylgjast mikið með þjóðmálunum. Guðríður vann alla tíð heima við og er minnug og heilsuhraust. Hún segist vera ánægð með aldurinn og njóta þess að eiga góða fjölskyldu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.