Aðstandendur aðstoða á hjúkrunarheimilum

Aðstandendur íbúa á sjúkra- og hjúkrunarheimilum hafa í dag komið til aðstoðar vegna verkfalls sjúkraliða. Komi til allsherjarverkfalls eru líkur á að kalla þurfi til þeirra til frekari aðstoðar allan sólarhringinn.  

Um sjö hundruð sjúkraliðar lögðu niður störf í dag. Náist samningar ekki verður boðað til allsherjarverkfalls 22. maí.

Lítið hefur þokast í kjaraviðræðum sjúkraliða og að sögn Gunnars Arnar Gunnarssonar, framkvæmdastjóra Sjúkraliðafélags Íslands, hafa umræður um launakjör enn ekki borið á góma.

„Það er eiginlega hjákátlegt að segja frá því að við höfum ekki komist í að ræða launakjör. En það eru ekki bara launin, vinnuumhverfið eins og það er núna er mannskemmandi,“ segir Gunnar Örn og bætir við að kröfur þeirra snúist jafnframt að sjúkraliðar njóti sambærilegra réttinda og opinberir starfsmenn.

Hann segir mikinn skort vera á sjúkraliðum á hjúkrunarheimilum landsins, nægar fjárveitingar séu ekki gefnar og því séu ófaglærðir í forgangi þegar kemur að ráðningu nýrra starfsmanna. „Hlutfall sjúkraliða er um 30 prósent þegar best lætur. “ Þá segir hann hlutfall sjúkraliða þar sem verst er vera um 10 – 20 prósent. 

Næsta fyrirhugaða vinnustöðvun sjúkraliða er á mánudag. Gunnar segir ríkissáttasemjara enn ekki hafa boðað fulltrúa á annan fund.

„Áhugaleysið virðist algjört þarna hinum megin, því miður. En við verðum að vona að þeir finni til ábyrgðar svo ekki komi til frekari aðgerða af okkar hálfu.“

„Ég hef ekki hugmyndaflug í að hugsa það alveg til enda hvað gerist ef til allsherjarverkfalls kemur. Þetta er ömurleg staða. En undanþágunefnd mun þó sjá til þess að enginn verði fyrir skaða,“ segir Gunnar að lokum.