Verkfall á öldrunarheimilum

Félagar í Sjúkraliðafélagi Íslands og ófaglærðir sem eru innan vébanda SFR, stéttarfélags í almannaþjónustu, leggja niður störf í dag á 20 stofnunum sem eru innan Samtaka fyrirtækja í velferðarþjónustu. Hátt í 2.000 manns eiga heima á þessum stofnunum.

Auk þess leggja áfengisráðgjafar hjá SÁÁ niður störf. Alls eru þetta nálægt 500 manns.

Sömu starfsstéttir lögðu niður störf á mánudag og hafði það mikil áhrif á starf á dvalarheimilum aldraðra. Að sögn hefur miðað í átt til samkomulags í deilunni.

Það sem steytir helst á er að starfsfólk á þessum stofnunum vill njóta sömu réttinda og ríkisstarfsmenn þegar kemur að uppsögnum. Um það hefur enn ekki samist.