Gagnrýnir skopmyndateikningar

Á morgun er alþjóðlegur dagur baráttunnar fyrir fullu tjáningarfrelsi. Þúsundir koma til með láta af sér kveða, og margir hverjir nota daginn í að teikna myndir af Múhameð spámanni múslima.

Tilgangur teikninganna er sá að ekki verði látið viðgangast að fólki sé hótað lífláti fyrir að teikna myndir af trúarleiðtoga. Dagurinn hefur því oft verið kallaður „Teiknaðu Múhameð dagurinn“en hugmyndin varð til 20.maí 2010 eftir að höfundum teiknimyndaþáttanna South Park var hótað lífláti eftir að Múhameð birtist í einum þáttanna. Stofnaðar voru vefsíður sem pakistönsk stjórnvöld létu loka jafnóðum.

Salmann Tamimi  gagnrýnir þessa leið tjáningarfrelsis harðlega.

„Ég styð tjáningarfrelsi. En þetta get ég ekki tengt við tjáningarfrelsi. Hér erum við að tala um asnalegar teikningar af manni sem er mikils virtur af þriðjungi mannkyns og getur ekki varið sig sjálfur. Hann gerði engum mein,“ segir Salmann.

„Ég er alinn upp við það að virða trú og skoðanir annarra og mér finnst bara fáránlegt að gera eitthvað svona, að nota eitthvað svona sem er dýrmætt fyrir öðrum manni. Þetta er bara fáránlegt.“

Myndbirtingar af spámanninum féll í grýttan jarðveg hjá múslimum víða um heim árið 2005. Danska blaðið Politiken og fleiri blöð birtu svo aftur eina myndina árið 2008 þegar lögreglan upplýsti um meint morðtilræði á hendur teiknaranum Kurt Westergaard, sem teiknaði eina myndina.

Mynd Westergaard birtist í Jótlandspóstinum haustið 2005 og báðust forsvarsmenn blaðsins afsökunar á myndbirtingunum. Westergaard fékk fjölmargar hótanir símleiðis og bréfleiðis og nafnar hans jafnframt, sem voru 81 á þessum tíma. Kvað svo rammt að þessu að danska leyniþjónustan var kölluð til, til að gæta nokkurra þeirra.