Björgólfur Thor gagnrýnir bók Ólafs Arnarsonar

Nýverið sendi Ólafur Arnarson frá sér bókina Skuggi sólkonungsins – er Davíð Oddsson dýrasti maður lýðveldisins? Athafnamaðurinn Björgólfur Thor Björgólfsson, sem talinn hefur verið einn af lykilpersónum í hruninu til dæmis sem einn eigenda Landsbankans, fjallar um bókina og óhætt er að segja að Björgólfur sé fremur óvæginn gagnrýnandi. Hann segir að nú sé enn ein hrunbókin komin, að Ólafur fari á hundavaði yfir einkavæðingu bankana og fullyrði að nánast engir peningar hafi komið inn í Landsbankann og Búnaðarbankann við einkavæðingu þeirra.

„Það er með ólíkindum að enn skuli þurfa að hnykkja á staðreyndum hvað varðar einkavæðingu Landsbankans, svo löngu eftir að þær eru allar komnar fram. 65% kaupverðs Landsbankans komu úr vösum eigenda Landsbankans,“ skrifar Björgólfur Thor.

Umfjöllun Björgólfs hefst á orðunum: „Hátt í sex árum eftir fall bankanna og fjórum árum eftir útgáfu skýrslu rannsóknarnefndar Alþingis ganga sömu vitleysurnar enn ljósum logum í umræðunni. Höfundur nýjustu hrunbókarinnar dregur ekkert af sér. Bók hans hverfist að sönnu um fyrrverandi forsætisráðherra, en ýmis stórmál eru afgreidd snaggaralega – og ranglega.“ Bókadómurinn er svo undir fyrirsögninni „Skuggi múrmeldýrsins“ og þar segir ennfremur að fullyrðingagleðin ríði ekki við einteyming í bókinni. Og óvænt sé hún á köflum eins og þriggja ára pistill eftir Bubba Morthens.

Björgólfur segir Ólaf vitanlega ekki þann fyrsta til að falla í þá gryfju að hafa það sem betur hljómar. „Höfundur bókarinnar Skuggi sólkonungs er vitanlega ekki sá fyrsti sem fellur í þá gryfju að hafa það sem betur hljómar. Það kemur þó spánskt fyrir sjónir að sá sem gjarnan vill teljast marktækur sem álitsgjafi skuli ekki gæta þess að fara rétt með staðreyndir, enda rýra augljós ósannindin bókina í heild. Að lesa hana er svipað og að horfa á kvikmyndina Groundhog Day: Ekkert breytist, sami dagurinn rennur upp æ ofan í æ. Og ef múrmeldýrið sér skugga sinn verður veturinn lengri. Nú er hins vegar orðið löngu tímabært að birti yfir umræðunni,“ skrifar Björgólfur Thor og slær með þeim orðum botn í dóm sinn sem lesa má í heild sinni hér.