Láku upplýsingum um ferðahagi danska kóngafólksins á Íslandi

„Stórir hlutir eru að gerast í Danmörku.“  Þetta segir uppljóstrarinn Edward Snowden í opnu bréfi í danska dagblaðinu Berlinske.

Fyrrum blaðamaður hjá slúðurtímaritinu Se og Hør gaf út bók á dögunum þar sem hann segir frá persónunjósnum tímaritsins síðastliðin fjögur ár. Um er að ræða starfsmann, hugbúnaðarsérfræðing, hjá danska kortafyrirtækinu Nets sem tímaritið réði til þess að fylgjast með kortanotkun fólks.

Alltaf hætta á njósnum - hvar sem er í heiminum

Í grein Snowdens segir hann það ekki skipta máli hvort tölvupóstur sé skrifaður í Árósum, kreditkortið sé notað í Óðinsvéum eða hringt sé í móður sína í Kaupmannahöfn, miklar líkur séu á að símtalið verði tekið upp og hlerað, rannsakað og síðan geymt af ríkinu og jafnvel einkafyrirtækjum og dagblöðum.

Hann segir þetta mál varpa ljósi á alþjóðlegt vandamál sem sé að gerast hvaðanæva í heiminum og því sé nauðsynlegt að gripið verði til aðgerða.

Njósnunum var einna helst beint til þjóðþekktra einstaklinga, og var konungsfjölskyldan og forsætisráðherra landsins á meðal þeirra.

Upplýsingar sendar til blaðamanna í sms skilaboðum

Samkvæmt smáskilaboðum sem birt eru á vefsíðu BT má sjá hversu miklum pening María prinsessa eyddi í flugstöð Leifs Eiríkssonar. Prinsessan notaði kort sitt í tvígang, í annað skiptið eyddi hún rúmum 102 þúsund krónum og í hitt skiptið rúmum tólf þúsund krónum. Þá eru einnig upplýsingar um ferð Jóakims prins í Bláa lónið.

Leikararnir gamalkunnu, Casper Christensen, sem er hvað helstur fyrir þættina Klovn, og Mads Mikkelsen eru meðal þeirra sem urðu fyrir barðinu á persónunjósnum tímaritsins. Þeir ætla að höfða mál gegn Aller Media, útgáfufélagi Se og Hør.

Fengu farþegalista SAS

Þá greiddi tímaritið einnig fyrir upplýsingar um farþega frá flugfélaginu SAS. Samkvæmt dönsku sjónvarpsstöðinni TV2 hefur starfsmaður SAS veitt tímaritinu farþegaupplýsingar til fjölda ára.

Í nýlegri könnun danska blaðsins Politiken eru níu af hverjum tíu sammála því að réttur manna til friðhelgi einkalífsins sé mikilvægari en njósnir. Allt að sjötíu prósent Bandaríkjamanna eru sammála því.