„Ég sparkaði bara eins og tryllt manneskja“

„Lögreglan kom hingað í gær og spurði mig fleiri spurninga. Eina sem ég veit er að hann er hávaxinn, grannur og rétthentur,“ segir Svanhvít Magnúsdóttir, sem varð fyrir líkamsárás í dyragættinni á heimili sínu í síðustu viku.

Málið hefur vakið mikla athygli, en upphaflega var greint frá málinu í kvöldfréttum RÚV

„Hér var bankað upp á seint á mánudagskvöldi. Ég stend upp og opna dyrnar. Þá sé ég grímuklæddan mann sem kýldi mig í andlitið. Ég varð bara brjáluð úr reiði. Ég varð ekki hrædd – eða ég fann allavega ekki fyrir því. Ég sparkaði í manninn og hitti hann á milli fótanna,“ rifjar Svanhvít upp í samtali við Vísi og heldur áfram:

„Ég sparkaði bara eins og tryllt manneskja – það var ekkert meiningin að hitta hann þarna. Þetta voru bara viðbrögð í einhverjum tryllingi.“

Lögreglan rannsakar málið

Lögregla var kölluð á vettvang sama kvöld. Málið er enn í rannsókn og komu lögreglumenn til Svanhvítar í gær til þess að spyrja hana fleiri spurninga.

„Þeir voru að vonast til þess að ég mundi eftir einhverju meiru en ég gat sagt þeim fyrir viku síðan. En ég gat eiginlega ekki sagt þeim neitt meira. Eina sem ég veit er að hann er hávaxinn, grannur og rétthentur. Ég veit ekki hvort þetta sé útlendingur eða Íslendingur, hann sagði ekki orð. Hann bara gekk eitt skref inn í íbúðina og kýldi mig með krepptum hnefa. Eina skiptið sem ég heyrði eitthvað í honum var eftir að ég sparkaði í hann. Þá gaf hann frá sér einhver hljóð og hljóp á brott.“

Hún segist ekki hafa heyrt neitt meira um hver þetta hafi hugsanlega verið. „Ég veit bara ekki neitt meira um þetta nema að mig grunar að vesalingurinn hafi nú ekki verið allsgáður.“

Ekki opna fyrir hverjum sem er

„Ég vona bara að þetta verði einhverjum öðrum víti til varnaðar. Ég vona bara að fólk læsi hurðum sínum og opni ekki fyrir hverjum sem er. Maður þarf að hafa varann á,“ segir Svanhvít.

Svanhvít er að jafna sig eftir árásina, henni var vitanlega brugðið. „Fyrstu viðbrögðin voru eiginlega bara undrun. Ég veit ekki hvernig ég ætti að lýsa því öðruvísi. Svo fór ég að gera mér betur grein fyrir þessu og á miðvikudeginum var ég orðin svolítið döpur.“

Hún segir friðhelgi heimilis síns hafa verið rofna þetta mánudagskvöld. „Mér finnst þetta bara einum of gróft. Að banka bara upp á og ráðast á mann. Ég veit ekki hvað manninum gekk til.“

Rannsókn málsins er enn í fullum gangi að sögn lögreglu.