Leggjast ekki gegn Bjarnarflagsvirkjun

Aðalfundur Veiðifélags Mývatns felldi tillögu um að skorað yrði á sveitarstjórn Skútustaðahrepps að veita ekki frekari leyfi til framkvæmda við Bjarnarflagsvirkjun. Samkvæmt frétt í Akureyri vikublað var tillagan felld í leynilegri atkvæðagreiðslu með 18 atkvæðum gegn 14 eftir miklar umræður á fundinum.

Bragi Finnbogason bar upp ályktunina en í henni var skorað á sveitarstjórn og aðra sem koma að leyfisveitingum að veita ekki frekari leyfi til framkvæmda við jarðgufuvirkjanir í næsta nágrenni Mývatns. Í rökstuðningi var meðal annars vísað til þess að svæðið væri á rauðum lista umhverfisyfirvalda vegna áforma um Bjarnarflagsvirkjun, mengandi frárennslis frá mannabyggð og hnignunar kúluskíts. Virkjun í Bjarnarflagi gæti valdið kólnun og minna rennsli vatns til Mývatns og eiturefnamengun af borholuvökva. 

Tillagan var felld, sem fyrr sagði, en aðalfundur veiðifélagsins fór fram um síðustu helgi. Akureyri vikublað segir að meðal þeirra sem talað hafi gegn tillögunni hafi verið sveitarstjóri Mývetninga og verktaki við undirbúningsframkvæmdir vegna fyrirhugaðrar Bjarnarflagsvirkjunar.