Þurrkur á hálendi þýðir olíubrennslu á Vestfjörðum og lokun sundlauga

Lág vatnsstaða á hálendinu í lónum Landsvirkjunar veldur því að sundlaugum á Vestfjörðum verður lokað á morgun um óákveðinn tíma og Vestfirðingar þurfa að fara að kynda með olíu með yfir 200 milljóna viðbótarkostnaði. Landsvirkjun tilkynnti Orkubúi Vestfjarða í fyrradag um skerðingu á ódýrri afgangsorku og er óttast að hún geti varað næstu tvo mánuði, að sögn Kristjáns Haraldssonar orkubússtjóra.

„Sú skerðing gæti jafnvel staðið í mars og apríl og ef það verður að veruleika þá mun Orkubú Vestfjarða lenda í aukakostnaði upp á rúmlega 200 milljónir af því að við þurfum að nota olíu í staðinn fyrir þetta rafmagn sem við hefðum annars fengið,“ segir Kristján.

Þennan viðbótarkostnað þurfa vestfirsk heimili og fyrirtæki að bera en Kristján segir svona viðbótarútgjöld á endanum lenda á viðskiptavinum fyrirtækisins.

Lág vatnsstaða á hálendinu bitnar sennilega mest á íbúum Þingeyrar og Hólmavíkur en tilkynnt var í dag að sundlaugunum þar yrði lokað um óákveðinn tíma. Það verður því ekki synt í hinni glæsilegu sundlaug Þingeyrar á næstunni því hún er kynnt með afgangsorku.

„Það er ekkert annað um að ræða en að loka henni vegna þess að þar hefur sveitarfélagið ekki komið upp annarri kyndingu en rafmagni og þegar rafmagnið ekki fæst þá verður að loka,“ segir orkubússtjórinn.

Ísafjarðarbær birti eftirfarandi tilkynningu vegna málsins í dag:

„Því miður verður Þingeyrarlaug lokuð um óákveðinn tíma frá og með 1. mars. Vegna bágrar vatnsstöðu í lónum Landsvirkjunar er ekki hægt að afhenda svokallaða „ótrygga orku“, en Þingeyrarlaug er ein lauga Ísafjarðarbæjar með svo hagstæða samninga um kaup á rafmagni. Íþróttahúsið verður lokað yfir helgina af sömu ástæðu. Ekkert er hægt að fullyrða um það hvenær hægt verður að opna, en eftir helgi verður í það minnsta reynt að halda íþróttahúsinu opnu. Nánari frétta af málinu er að vænta eftir helgi.

Dýrfirðingar og aðrir gestir laugarinnar og íþróttahússins eru beðnir velvirðingar á þessu ástandi sem varir vonandi ekki lengi. Eins er beðist velvirðingar á þeim skamma fyrirvara sem er gefinn, en málið kom ekki upp fyrr en í gær."