Harma að ráðherra hafi sett okkar veikasta fólk í þessa stöðu

„Því verri stöðu sem skjólstæðingar okkar eru í, því verr lendir þetta á þeim. Það þykir okkur mjög miður og við hörmum að sú staða sé komin upp að ráðherra hafi sett okkur veikasta fólk í svona ömurlega stöðu,“ segir Unnur Pétursdóttir, formaður Félags íslenskra sjúkraþjálfara.

Skjólstæðingar sjúkraþjálfara þurfa nú að leggja út fyrir fullu gjaldi meðferðar og sækja sjálf endurgreiðslu gjaldsins til Sjúkratryggingar Íslands. Kristján Þór Júlíusson, heilbrigðisráðherra, skrifaði ekki undir samning milli Sjúkratryggingar Íslands og sjúkraþjálfara og sagði hann áherslur samningsins ekki hafa fallið nógu vel að markmiðum ríkisstjórnarinnar í kjarasamningum.

„Ég vona svo sannarlega að það sé nógu mikill strengur í ráðherra svo hann sjái til þess að það fari ekki svo að við séum samningslaus svo mánuðum skiptir. Það er líka fróðlegt að vitna í hans eigin orð þegar hann skrifaði undir samning við sérfræðilækna um áramótin. Þá skrifaði hann undir með þeim orðum að það væri ábyrgðarhluti að láta fagstéttir vera utan samnings. Það er nákvæmlega sú staða sem hann er að búa til núna, sem hann sagði þá að væri óásættanleg,“ segir Unnur.

„Þeir vilja meina að þessi samningur samræmist ekki verðlagsmarkmiðum. Samningsleysi til lengri tíma þýðir óhjákvæmilega að þeir veikustu, sem eru sá hópur sem bæði á erfiðast með að leggja út fyrir heildargjaldinu og að sækja sér endurgreiðsluna. Þetta eru þeir hópar sem eru veikastur og niðurstaðan yrði sú að þeir þyrftu líklega að leggjast inn á sjúkrahús eða stofnanir. Hvar er sparnaðurinn í því?“

Þá segir Unnur að sjúkraþjálfun sé í raun ódýrt úrræði í heilbrigðisþjónustu. „Dýrustu úrræðin, fyrir utan dvöl á sjúkrahúsi, eru skurðaðgerðir og lyf. Sjúkraþjálfun getur í mörgum tilfellum haldið fólki utan sjúkrahúsa og gerir öldruðum kleyft að búa heima í stað stofnanna eða sjúkrahúsa. Lyfjanotkun minnkar og oft er hægt að koma í veg fyrir eða fresta þörf á aðgerðum. Sjúkraþjálfun getur sparað mjög stórar fjárhæðir annarsstaðar í kerfinu. Að þrengja að sjúkraþjálfun er ekki til sparnaðar.“

„Okkur þykir afskaplega leitt að þurfa að auka fólki óhagræði með þessu móti. Svo eru hópar sem lenda illa í þessu. Við erum að þjónusta fatlað fólk, fólk með fötluð börn og aldrað fólk sem jafnvel er komið með elliglöp og getur illa haldið utan um svona mál. Það er snúið fyrir sjúkraþjálfara sem eru að þjónusta slíkt fólk. Það er ekki síst þeirra vegna sem við viljum vera með samning, en ráðherra virðist vera á annarri skoðun.“

„Það að ráðherra neitaði að skrifa undir er mjög fróðlegt í ljósi þess að samningstilboðið kom frá Sjúkratryggingum Íslands. Sem er sú nefnd sem sér um samningagerð fyrir hönd ríkisins. Þetta er mjög undarleg staða.“

„Undarlegheitin eru hvað mest þau að á meðan samningaferlinu stóð var mjög ljóst að samninganefnd Sjúkratrygginga var í samskiptum við fjármálaráðuneytið. Áður en gengið frá samningum. Ég get ekki ætlað annað en að ráðuneytið hafi verið fullkomlega upplýst um stöðu mála í viðræðunum.“

„Ef við verðum kölluð aftur að samningsborðinu verðum við að spyrja okkur hvort við séum að ræða við nefnd sem hefur samningsumboð eða ekki. Við ætlum ekki að eyða öðrum mánuði í botnlausa vinnu við að búa til samning við umboðslausa nefnd,“ segir Unnur.