Höldum fókus hefur náð verulegum árangri

Höldum fókus, átaksverkefni Samgöngustofu og Símans til að koma í veg fyrir farsímanotkun undir stýri, hefur náð miklum, mælanlegum árangri.

Samkvæmt samanburðarkönnunum Capacent hefur fjöldi þeirra sem segjast oft tala í síma við akstur hafa fækkað úr 50% árið 2012 niður í 41% í desember 2013. Að sama skapi sögðust 22% ökumanna á aldrinum 18-24 ára oft tala í símann áður en herferðinni var komið í loftið en einungis 8% eftir sumarið 2013. „Óhætt er að segja að þetta sé framar öllum vonum aðstandandenda herferðarinnar," segir á vef Samgöngustofu.

Verkefninu var hrint úr vör seinasta sumar og vakti gríðarlega athygli fyrir frumlega og áhrifaríka framsetningu. Höldum fókus hlaut verðlaun sem besta markaðsherferðin á netinu árið 2013 á Íslensku vefverðlaununum sem voru veitt í gærkvöldi. Auk þess var vefurinn tilnefndur sem frumlegasti vefurinn.