Tíu starfsmönnum sagt upp hjá Ási í Hveragerði

Tíu starfsmönnum verður sagt upp hjá Dvalarheimilinu Ási í Hveragerði og starfshlutfall skert hjá þrjátíu starfsmönnum. Þetta er gert vegna bullandi taps á rekstri heimilisins vegna alltof lágra daggjalda frá ríkinu. „Óhugur í fólki “, segir Júlíus Rafnsson, framkvæmdastjóri Áss.

140 starfsmenn starfa á Ási í mismunandi starfshlutföllum og heimilismennirnir eru 127.  Mikill taprekstur hefur verið á dvalarheimilinu síðustu þrjú ár, eða á annað hundrað milljónir króna. Júlíus segir að nú sé nóg komið, bregðast þurfi  við ástandinu og segja upp fólki. 10 starfsmönnum verður sagt upp og gripið til fleiri aðgerða.



„Það verða tilfærslur í stöðugildum hjá fólki, skornir niður hinir ýmsu kostnaðarliðir, sumir algjörlega í burtu ef við getum gert það og annað reynt að minnka eins og mögulegt er því þetta gengur ekki lengur eins og þetta hefur verið“, segir Júlíus.



Hann segir að stjórnvöld séu vandamálið, þau hafi ekki áhuga á gamla fólkinu, hvort sem það var fyrrverandi ríkisstjórn eða núverandi stjórn.



„Stjórnvöld hafa ekki sinnt málefnum aldraðra það mikið, það er ekki áhugi hjá þeim að það sé borgað fyrir þjónustu þeirra, sem eru inn á heimilum með eðlilegum hætti, það er höfuðvandamálið“.



47 þúsund legudagar eru á ári á Ási og segir Júlíus að heimilið þurfi a.m.k. þúsund krónur meiri á dag frá ríkinu svo reksturinn standi undir sér, eða 47 milljónir króna fyrir árið 2014. Hann segir starfsfólk hafa miklar áhyggjur af stöðunni.



„Það er að sjálfsögðu óhugur í fólki þegar svona tilkynning berst“, segir Júlíus.



En hvaða skilaboð á Júlíus til stjórnvalda ?



„Að hugsa um gamla fólkið“.



Í fréttum Stöðvar 2 í gærkvöldi um Ás var sagt að tap á rekstri dvalarheimilisins væri tæplega tvöhundruð milljónir króna á síðustu þremur árum en það er ekki rétt, tapið nemur á annað hundrað milljónum króna. Beðist er velvirðingar á þessu.