Telur dýrategundum mismunað í umfjöllun

„Mér finnst þetta vera svolítið öfugsnúið og þetta er ekki hugsun sem ristir mjög djúpt.“ segir Árni Stefán Árnason, lögfræðingur og sérfræðingur um íslensk dýraverndarlög, um viðbrögð við aflífun dýragarðsins í Kaupmannahöfn á gíraffanum Mariusi. Um aflífunina á Mariusi var fjallað í fréttum Stöðvar 2 í kvöld.

Árni, sem er sendiherra á Íslandi fyrir alheimsdýraverndarsamtökin World Animal Day, telur að gíraffinn hafi verið aflífaður á mannúðlegan hátt og að eðlilegt hafi verið að nota hann í fóður. 

„Það sem stingur mig mest er að dýraverndarsinnar skuli fara af stað með þennan æsing og senda undurskriftalista á meðan þúsundir búfjár eru felld í þágu dýragarða í dag. Dýr sem hafa þurft að lifa við slæman aðbúnað alla sína ævi. Það er þessi mismunun sem á sér stað, hún æpir á mig,“ segir Árni og bætir við að dýrum sé þarna augljóslega mismunað.

„Það búfé sem er alið upp í verksmiðjubúskap og síðan selt til að fóðra bæði ljón og önnur dýr, maður sér ekkert fjallað um þau. Þessi gíraffi var aflífaður á mannúðlegan hátt og hann er síðan gefinn ljónunum. Þó ég sé á móti dýragörðum þá finnst mér þarna eiga sér stað ákveðin mismunun að ein dýrategund skuli að fá slíka umfjöllun meðan aðrar þurfa jafnvel að líða kvalir í verksmiðjubúskap áður en þær eru gefnar dýrum í dýragörðum.“

Árni telur að hugarfarsbreyting þurfi að eiga sér stað í þessum málum.

„Dýragarðar eiga að mínu mati ekki að vera til og að ein dýrategund þurfi að þjóna nákvæmlega sama hlutverki og gíraffinn án þess að nokkur tali um það, ég bara kaupi þetta ekki.“ segir Árni Stefán.