Lögreglumaðurinn ætlar í mál vegna lekans í kynferðisbrotamálinu

Lögreglumaðurinn sem var til rannsóknar vegna meints kynferðisbrots ætlar að leita réttar síns gagnvart aðstandendum vefsíðu sem birtu rannsóknargögn í máli hans.

Þetta staðfestir Vilhjálmur H. Vilhjálmsson, lögmaður mannsins.

„Þessi birting er fráleit,“ segir Vilhjálmur: „Ég velti því fyrir mér hvaða ráð ég eigi að gefa umbjóðendum mínum  sem eru boðaðir í skýrslutöku hjá lögreglu, annað hvort sem vitni eða sakborningur. Sakborningar og vitni verða að geta treyst því að geta gefið skýrslu lögreglu án þess að eiga það á hættu að gögnin verði birt almenningi á netinu. Hér er um viðkvæmar persónuupplýsingar að ræða sem eiga ekkert erindi við almenning.“

Lögreglumaðurinn var fyrir tveimur árum kærður fyrir kynferðisbrot gegn stúlku. Stúlkan, sem nú á sautjánda aldurári, var níu ára þegar meint brot áttu sér stað. Málið var til rannsóknar hjá lögreglunni á Akranesi. Það kom meðal annars inn á borð utanríkisráðuneytisins, ríkislögreglustjóra og ríkissaksóknara en var að lokum látið niður falla.

Eins og fram kom á Vísi voru öll gögn í málinu, þar á meðal yfirheyrslur yfir sakborningum og vitnum, birt á vefsíðu en móðir stúlkunnar gaf sitt leyfi fyrir birtingu gagnanna. Ríkissaksóknari íhugar nú að aðhafast í málinu.

Vilhjálmi þykir málið alvarlegt. „Hvers konar manneskjur eru það sem taka slíka ákvörðun fyrir börn að viðkvæm gögn um þau verði í vörslum ókunnugra um aldir alda?“

Vilhjálmur tekur undir skoðanir Brynjars Níelssonar, sem sagði í samtali við fréttastofu Stöðvar 2 að birting svona gagna vegi að réttarríkinu. „Já, þetta vegur með mjög alvarlegum hætti að stoðum réttarríksins. Meðal annars af þeirri ástæðu höfum við ákveðið að aðhafast í málinu. Þetta þarf að stöðva,“ segir Vilhjálmur.