"Þegar við erum að tala um fjölbreytileika, er þá nóg að líta bara til karla og kvenna?"

„Mig langar einfaldlega að fara vel yfir þessi lög þó að ég hyggist ekki gera neinar breytingar á þessu þingi. Það er fínt að fá þessa tölfræði til þess að sjá hvort þetta virki," segir Ragnheiður Elín Árnadóttir iðnaðarráðherra um niðurstöður nýrrar úttektar Creditinfo. Úttektin leiðir í ljós að um helmingur íslenskra fyrirtækja uppfyllir reglur um kynjakvóta í stjórnum fyrirtækja.

Eins og kom fram í frétt Vísis þann 13. janúar hyggst iðnaðarráðherra endurskoða þær breytingar sem voru gerðar á lögum um hluta- og einkahlutafélög árið 2010.

Ragnheiður Elín segir að alltaf þurfi að stíga varlega til jarðar þegar verið sé að beita þvingunum á einkaaðila. „Það má ekki gleyma því að þarna er verið að tala um einkafyrirtæki þar sem að eigendur fyrirtækjanna eiga að hafa mest um það að segja hverjir sjái um að stjórna þeim," segir Ragnheiður.

Fjölbreytileiki nær ekki bara til ólíkra kynja

Í grein Sigríðar Andersen flokkssystur iðnaðarráðherra í Morgunblaðinu í dag er sjónarmiðum um hversu langt jafnréttislöggjöf í stjórnum fyrirtækja skuli ná velt upp. Í greininni er því meðal annars velt upp hvort slík löggjöf ætti ekki einnig að tryggja starfsmönnum fyrirtækja sæti í stjórnum eða fólki með ólíka menntun.

Innt eftir viðbrögðum sínum við þeirri grein segir Ragnheiður Elín: „Þegar við erum að tala um fjölbreytileika, er þá nóg að líta bara til karla og kvenna? Hvers vegna að stoppa bara þar?" segir Ragnheiður. „Hvað með til dæmis sjónarmiðið um að fólk úr ólíkum áttum í þjóðlífinu eigi að koma að stjórnum fyrirtækja, eins og til dæmis fólk utan af landsbyggðinni? Þetta eru áhugaverð og réttmæt sjónarmið, þegar löggjöf af þessu tagi er annars vegar. Karlar og konur eru ekki einu ólíku þjóðfélagshóparnir," segir Ragnheiður.

Hún tekur þó fram að hún sé á móti slíkri lagasetningu. „Er þetta eitthvað sem við þurfum löggjöf til að breyta eða er þetta eitthvað sem við gætum náð fram með umræðunni og með breyttu hugarfari?" spyr Ragnheiður og bætir við: „Að sama skapi og ég var ekki talsmaður lagasetningarinnar á sínum tíma þá er ég fyrirfram alltaf frekar hlynntari því að leyfa fólki að gera slíkar breytingar að eigin vali." Aðspurð segist hún af sömu ástæðum vera andsnúin því að innleiða refsingar í löggjöfina uppfylli fyrirtæki ekki skilyrðin um kynjakvótann.