Fjárlagafrumvarp verður að lögum

Alþingi lýkur störfum fyrir jólaleyfi í kvöld með samþykkt fjárlagafrumvarps næsta árs án þess að stjórnarandstaðan næði fram mikilum breytingum þrátt fyrir langar umræður um frumvarpið. Stjórnarandstaðan segir ríkisstjórnina valda óvissu hjá starfsfólki fjölda stofnana og sýna menningarstarfsemi lítinn skilning.

Á síðustu metrunum fyrir fyrir jólaleyfi ítrekuðu þingmenn stjórnarandstöðunnar áhyggjur sínar af ýmsum ráðstöfunum í fjárlagafrumvarpinu, meðal annars varðandi Ríkisútvarpið, vinnumarkaðinn og fleira. Þá lifði starfsfólk ýmissa ríkisstofnana við mikla óvissu þessa daga vegna ákvarðana sem teknar hefðu verið að gefið í skyn að lægju í loftinu. Stjórnarþingmenn höfðu hins vegar margir fengið sig fullsadda af fjárlagaumræðunni.

„Á síðasta þingi gerði ég mér far um það að hringja í félaga mína í Sjálfstæðisflokknum og skamma þá fyrir málþóf sem mér finnst niðurlægjandi fyrir þennan vinnustað. Og ég fordæmi það málþóf sem hér hefur farið fram, síðast í gærkvöldi. Þetta er lítillækkun á þessum vinnustað og til háborinnar skammar fyrir okkur sem erum að vinna fyrir land og þjóð,“ sagði Ásmundur Einarsson, þingmaður Sjálfstæðisflokksins, sem kosinn var til þings í síðustu kosningum.

„Já, herra forseti, það á ekki af okkur að ganga undir þessari ríkisstjórn. Ég held svei mér þá að veðrið hafi ekki verið svona skítlegt í jólamánuðinum síðan á dögum Viðreisnar,“ sagði Steingrímur J. Sigfússon þingmaður Vinstri grænna. Þótt eflaust sé erfitt að kenna ríkisstjórninni eða fjárlagafrumvarpinu um óveðurstíðina að undanförnu.

Steingrímur ræddi annars menningarpólitík ríkisstjórnarinnar og viðhorf hennar til fjölmiðla. Framlög til menningarmála væri skorin við trog og virðisaukaskattur hækkaður á bækur og menningartengda starfsemi.

„En öllu alvarlegra er þó það viðhorf sem birtist í stanslausum árásum á fjölmiðla og fjölmiðlamenn. Þar sem þeir eru hundeltir fyrir það að segja fréttir. Sérstaklega ef það eru fréttir af ríkisstjórninni og sérstakur almannatengill á launum frá almenningi vinnur við það í stjórnarráðinu að stýra umfjöllun fjölmiðla um forsætisráðherrann og ríkisstjórnina,“ sagði Steingrímur.

Birgitta Jónsdóttir sagði málþóf ekki þurfa að vera neikvætt.

„Í mínum huga er málþóf í sjálfu sér ekkert neikvætt fyrirbæri. Málþóf þjóna ákveðnum tilgangi og eru oft eina verkfærið sem minnihlutinn hefur til að skapa umræðu um mál sem eru illa unnin eða hreinlega háskaleg. Þannig að við skulum ekki tala niður þetta verkfæri minnihlutans,“ segir Birgitta Jónsdóttir.