Hætti rekstri á 30 ára afmæli videoleigunnar

Helgi Sigurðsson hefur hætt rekstri videoleigu sinnar í Sprettur-inn á Akureyri. Hann hætti rekstrinum nákvæmlega 30 árum eftir að hann byrjaði að leigja kvikmyndir. Síðastliðinn laugardag, þann 8. nóvember hóf Helgi sölu á þeim DVD diskum sem hann átti, en Helgi stofnaði leiguna þann 8. nóvember 1984.

„Þetta var búið að vera mjög dapurt. Ég ákvað í vor að ná sumrinu og horfði reyndar svolítið til þessarar dagsetningar. Ég ákvað að ef þetta héldi áfram niður á við, eins og hefur verið, að þetta yrði dagurinn,“ segir Helgi í samtali við Vísi.

Nú er engin videoleiga á Akureyri að bókasafninu undanskildu, þar sem eitthvað er af kvikmyndum til leigu samkvæmt Helga. „Samkeppnin kemur úr öllum áttum,“ segir hann hlæjandi.

Helgi segir leigu kvikmynda hafa minnkað snarlega á undanförnum árum. „Síðustu fjögur ár hefur leigan minnkað um einhver fimmtíu prósent á ári. Samkvæmt tölunum hjá mér er það þannig.“

Þessa þróun segir Helgi að fólk verði að sætta sig við, þrátt fyrir að margir hafi orð á því hve leiðinlegt það sé að videoleigur séu að gefa upp laupana.

„Þetta er bara eitthvað sem maður verður að sætta sig við,“ segir Helgi. Í dag kom til hans kona sem keypti af honum DVD disk. Hún hafði orð á því hve leiðinlegt það væri að Helgi væri að hætta rekstri leigunnar.

„Ég spurði hvort hún hefði verið að leigja. Svo var ekki. Svona er þetta bara, hún er ekkert ein í því.“

Helgi mun nú einbeita sér að pítsubakstri í Sprett-inum. Þó losni mikið pláss vegna brotthvarfs leigunnar og segir hann að eitthvað muni breytast.