Neysluviðmiðin skoðuð að nýju reynist þess vera þörf

Matvara sem keypt er á veitinga- og kaffihúsum og mötuneytum er ekki inni í dæmum fjármála- og efnahagsráðuneytisins um útgjöld heimila í frumvarpi til laga um breytingar á virðisaukaskatti þótt Hagstofa Íslands geri ráð fyrir þeim í neysluviðmiðum sínum. Að öðru leyti er vísað til neysluviðmiða Hagstofunnar í frumvarpinu.

Fjármálaráðuneytið segir að þjónusta veitinga- og kaffihúsa og mötuneyta, þar með talinn hlutur matvæla í þeirri þjónustu, sé metin með annarri vöru og þjónustu í lægra þrepi virðisaukaskatts. Þetta kemur fram í yfirlýsingu frá ráðuneytinu í gær. Hins vegar er ekki útskýrt hvers vegna þessi leið er farin í ráðuneytinu.

Fjármálaráðuneytið sendi frá sér yfirlýsinguna í kjölfar frétta Fréttablaðsins af því að í forsendum virðisaukaskttsfrumvarpsins væri gert ráð fyrir að fjögurra manna fjölskylda eyddi 2.976 krónum á dag, í mat. Fréttablaðið óskaði eftir viðtali við Bjarna Benediksson fjármálaráðherra um málið í gær en hann veitti það ekki.

Bjarkey Gunnarsdóttir, þingmaður VG, segir að viðmiðin í virðisaukaskattsfrumvarpinu séu röng.

„Þetta á sér ekki stoð í raunveruleikanum og er því ráðuneytinu til vansa. Við þurfum að fá nánari útskýringar á þessu því þetta lítur út fyrir að vera einhver fundin tala til að ná fram í fjárlögum því sem þeir vilja ná fram – fjarri öllum raunveruleika.“

Í frumvarpinu er búist við því að fyrirhuguð hækkun á matarskatti kosti heimilin 4.315 krónur á mánuði. Sé kostnaður við matar- og drykkjarinnkaup meiri en raun ber vitni mun hækkun á matarskatti hafa mun meiri áhrif á hag heimilanna en ráð var fyrir gert.

Málið var til umræðu á Alþingi í gær. Árni Páll Árnason, þingmaður Samfylkingarinnar sagði að annaðhvort hefðu orðið mistök sem hljóti að kalla á endurskoðun á virðisaukaskattsfrumvarpinu eða þá hitt að ráðherrar ríkisstjórnarinnar hafi náð slíkum árangri í sparinnkaupum að þeir skuldi okkur öllum hinum námskeið í því hvernig eigi að láta enda ná saman með matarkostnað upp á 248 krónur á hverja máltíð.

Sigurður Ingi Jóhannsson atvinnuvegaráðherra varð til svara og sagði; „Hvað varðar nýlegar fréttir um neysluverðmið tel ég einboðið að þingnefndin sem fjalli um þetta mál taki það til ítarlegrar skoðunar. Komi í ljós að miðað sé við röng eða að einhverju leyti ekki fullnægjandi viðmið býst ég við að menn taki það til gagngerrar endurskoðunar í meðförum þingsins,“ sagði Sigurður Ingi.