„Bílbeltin björguðu lífi okkar“

„Ef það hefur einhvern tímann sannað sig þá er það núna. Bílbeltin björguðu lífi okkar,“ segir ung móðir sem síðastliðinn laugardag lenti í slæmu bílslysi við Selvog.

Rakel Lind Hrafnsdóttir var ásamt þremur börnum sínum, níu mánaða, tveggja ára og fjögurra, síðastliðinn laugardag á leið til Grindavíkur frá Flúðum þegar hún missti stjórn á bíl sínum á Suðurstrandarvegi með þeim afleiðingum að hann hafnaði utan vegar og valt. Bíllinn fór tvær veltur og gjöreyðilagðist.

Bjóst við að sjá börnin verulega slösuð

Hennar fyrsta hugsun var sú að börn hennar hefðu slasast en blessunarlega sakaði engan í slysinu.

„Þetta var bara skelfilegt og það fyrsta sem ég geri er að athuga með börnin, því ég bjóst við að líta í aftursætið og sjá þau verulega slösuð. En sem betur fer sluppu þau ótrúlega vel. Sá yngsti slapp alveg en minn tveggja ára marðist aðeins á auga og einn bólginn putti á þeirri fjögurra ára,“ segir Rakel. Hún sjálf slapp nokkuð vel, er aðeins marin og með skurð á hendi sem þurfti að sauma.

Rakel minnir á mikilvægi bílbelta því slys sem þessi geti alltaf gerst. Veðurskilyrði hafi þarna verið góð og hún ekki á nema 80-90 kílómetra. Eitthvað hafi farið úrskeiðis sem hún kunni ekki deili á.

„Þetta er bara allt saman alveg ótrúlegt. Og sjúkraflutningamennirnir töluðu um það hvað við höfðum það gott miðað við ástandið á bílnum, sem er bara ónýtur,“ segir Rakel.

Bjargvættir komu sem kallaðir

„Þessi lífsreynsla er auðvitað bara hræðileg og þetta kemur alltaf reglulega í hausinn á mér. Ég er svo ofboðslega þakklát að við séum heil á húfi. Ég horfi á börnin mín og þakka fyrir hvað við sluppum vel.“

Rakel þakkar ekki einungis bílbeltunum heldur einnig bjargvættunum tveimur sem komu fjölskyldunni til bjargar.

„Það var maður sem heitir Gylfi Gylfason sem kom í raun eins og kallaður. Hann hringdi strax á Neyðarlínuna og hann, ásamt manni sem heitir Ari, færðu börnin úr bílnum og í bíl Ara þar sem þeir hlúðu að þeim,“ segir Rakel að lokum, full þakklætis.