Mikill hiti í mótmælendum: Kalla þurfti til sérsveitarmenn

Um tuttugu manns mótmæltu harðlega ómannúðlegri meðferð á Izekor Osazee, hælisleitanda frá Nígeríu, í innanríkisráðurneytinu um eittleytið í dag.

Mótmælin hófust klukkan tólf við lögreglustöðina á Hverfisgötu en þaðan héldu mótmælendur yfir í innanríkisráðuneytið. Mikill hiti var í mótmælendum á svæðinu og átti lögreglan í vandræðum með að hafa stjórn á mannskapnum.

Fór svo að kalla þurfti til liðsauka og liðsmenn úr sérsveit lögreglunnar. Voru tólf lögreglumenn á svæðinu þegar mest var en mótmælendur yfirgáfu vettvanginn á öðrum tímanum.

Izekor Osazee, flóttamaður frá Nígeríu, var handtekin í gærmorgun þegar hún kom á lögreglustöð til að sinna tilkynningarskyldu. Osazee var sleppt úr haldi eftir að hafa setið í fangaklefa í rúmlega sjö klukkustundir, en brottvísun hennar úr landi hefur verið frestað.