Eyjamenn þurfa að fá lánað röntgentæki frá dýralækni

Máltækið „lengi getur vont versnað“ á vel við um ástandið í Heilbrigðisstofnun Vestmannaeyja um þessar mundir. Röntgentæki stofnunarinnar hefur verið úrskurðað ónýtt og hefur ekki verið nothæft alla þessa viku.

Vestmannaeyingar þurfa að fá lánað röntgentæki frá dýralækni í Reykjavík, svo slæmt er ástandið.

Ofan á þessi vandamál bætast svo lélegar samgöngur vegna yfirvinnubanns áhafnar Herjólfs. Setið er um miða í Herjólf, vegna færri ferða og einnig er erfitt að ná í flugmiða. Viðgerðamaður frá Reykjavík, sem átti að koma til Eyja á mánudag þurfti að bíða í rúman sólarhring eftir fari. Hann komst loks til Eyja, og gat litið á röntgentækið sem haldið var að væri bilað. En það reyndist ónýtt.

„Allt að hrynja“

Gunnar K. Gunnarsson er framkvæmdastjóri Heilbrigðisstofnunnar Vestmannaeyja. Hann segir ástandið í tækjamálum vera hrikalegt.

„Hér er allt að hrynja og enginn peningur til að kaupa nýtt. Við þurfum að fá tæki lánað frá dýralækni til bráðabirgða. Við vonumst svo til að fá nýtt röntgentæki eftir mánaðarmót, þegar Orkuhúsið endurnýjar tæki hjá sér. Það tæki dugar okkur vonandi í tvö til þrjú ár,“ segir Gunnar.

Vestmannaeyingar nota röntgentækið sitt nokkuð oft á dag að sögn Gunnars. „Það er erfitt að segja hversu oft nákvæmlega, en ég myndi ætla að það sé í kringum tíu til tólf sinnum á dag. Þetta hefur því skapað heilmikil vandræði.“

Samgöngur slæmar

Yfirvinnubann áhafnar Herjólfs hafa haft áhrif á þetta ástand í Heilbrigðisstofnun Eyjamanna. Viðgerðamaðurinn frá Reykjavík átti erfitt með að komast til Eyja og mun eiga jafnvel erfiðara með að komast þaðan.

„Við fáum lánstækið í hús um fjögurleytið á morgun. Þá á eftir að setja allt upp. Viðgerðamaðurinn þarf að fara á fund með erlendum gestum um helgina og má ekki missa af honum. Við vonumst til þess að Víkingur sigli til Landeyjahafnar á morgun, annars þarf hann að fá einkaflugvél til að sækja sig svo hann komist á fundinn,“ segir Gunnar.

Engir smápeningar

Gunnar segist vera búinn að ræða við heilbrigðisráðuneytið og láta vita af slæmum tækjakosti í Eyjum. „Við erum búin að kalla látlaust eftir meira fjármagni. Hér eru tæki í slæmu ástandi. Það er í raun allt að hrynja núna.“

Hann segir stofnunina þurfa mikið fjármagn til að endurnýja tækjakostinn. „Þetta eru stórar fjárháðir sem umræðir. Svona tæki eru dýr. Til dæmis er lampi í einu tæki bilaður hjá okkur. Lampinn kostar tíu milljónir og nýtt tæki fjörutíu milljónir. Þetta eru engir smápeningar sem þetta kostar,“ segir Gunnar.