Alfarið á móti færslu þjónustunnar frá Landmannalaugum

Forsvarsmenn Ferðafélags Íslands eru alfarið á móti færslu þjónustu frá Landmannalaugum og segja ótækt að biðja menn að ganga frá eigum sínum bótalaust. Hægt sé að ná sama árangri og færsla myndi skila, með einfaldari og hagkvæmari hætti.

Eins og Stöð 2 hefur áður fjallað um gerir rammaskipulag fyrir hálendið norðan Mýrdalsjökuls ráð fyrir að tjaldsvæði og gistiskálar færist út fyrir hjarta Landmannalauga. Ferðafélag Íslands hefur byggt upp þjónustuna og talsmenn færslunnar segjast vilja áframhaldandi samstarf.

„Þá á ég við að við erum ekki að reka neinn úr Landmannalaugum en við viljum færa þá til innan svæðisins,“ segir Kristinn Guðnason, sem situr í nefnd um framtíðarskipulag Landmannalauga.

Forsvarsmenn Ferðafélags Íslands eru hins vegar alfarið á móti færslu þjónustunnar.

„Það segir sig sjálft og þann lagagrunn höfum við skoðað, að það er ekkert hægt að ganga að eignum og hagsmunum manna og biðja þá um að gjöra svo vel að fara, bótalaust,“ segir Ólafur Örn Haraldsson, forseti Ferðafélags Íslands.

Hann segir hægt að ná sama árangri og færslan myndi skila, með einfaldari og hagkvæmari hætti. Tjöld og bílar yrðu þá færð út fyrir varnargarð svæðisins annars vegar og ána hins vegar, til að skapa opnari ásýnd.

„Fólk vill vera í Landmannalaugum. Í könnunum kemur fram að 90% ferðamanna eru ánægðir með dvöl sína þarna og við eigum auðvitað að hugsa um hagsmuni ferðamannanna um leið og við hugsum um verndun náttúrunnar og umhverfisins,“ segir Ólafur.

Hann kveðst finna mikla andstöðu við færsluna, bæði hjá ferðamönnum og ferðaskrifstofum. Aðspurður segir hann of snemmt að svara því hvort Ferðafélagið fari í mál ef af færslunni verði, en segir þó ljóst að gæta þurfi hagsmuna félagsmanna.

„Við getum ekki gengið frá fjárfestingum upp á meira en milljarð sem við höfum byggt upp á 60 árum. Að auki þyrftum við svo að byggja upp fyrir hundruð milljóna annars staðar, þarna erum við kannski að tala um einn og hálfan til tvo milljarða. Menn ganga ekkert þegjandi og hljóðalaust frá því,“ segir Ólafur.