Leiknir og Þróttur með fullt hús stiga | Aftur vann Grindavík ÍA

Fimm leikir fóru fram í 1. deild karla í dag.

Leiknir R. er með fullt hús stiga eftir 2-0 sigur á BÍ/Bolungarvík í Breiðholtinu. Sindri Björnsson og Óttar Bjarni Guðmundsson skoruðu mörk Leiknismanna í seinni hálfleik. Eyjólfur Tómasson varði vítaspyrnu Aarons Spear, leikmanns Vestfirðinga, í uppbótartíma.

Þróttur R. er einnig með sex stig, en liðið bar sigurorð af KA í dag með þremur mörkum gegn einu. Vilhjálmur Pálmason - sem skoraði tvö mörk í 4-1 sigri á Haukum í fyrstu umferðinni - kom Þrótturum yfir snemma leiks, en Arsenij Buinickij jafnaði leikinn á 20. mínútu. Fimmtán mínútum síðar kom Matthew Eliason Þrótti yfir á nýjan leik og hann gulltryggði svo sigurinn með marki um miðjan seinni hálfleik.

Grindavík vann 3-2 sigur á ÍA í hörkuleik, en liðin áttust einnig við í Borgunarbikarnum fyrr í vikunni þar sem Grindvíkingar höfðu betur, 4-1.

Eggert Kári Karlsson kom Skagamönnum yfir í leiknum í dag á 17. mínútu, en Jósef Kristinn Jósefsson jafnaði leikinn eftir rúman hálftíma. Grindvíkingar komust svo yfir með sjálfsmarki Arnórs Snæs Guðmundssonar á 50. mínútu og Tomislav Misura bætti svo við forystuna á 74. mínútu. Garðar Gunnlaugsson minnkaði svo muninn með marki úr vítaspyrnu í uppbótartíma.

Selfyssingar unnu góðan 0-1 sigur á Víkingum frá Ólafsvík í leik sem fór fram í Akraneshöllinni. Það var Elton Renato Livramento Barros sem skoraði markið á 90. mínútu.

Þá skildu Tindastóll og KV jöfn 2-2 á KA-vellinum. Brynjar Orri Bjarnason og Magnús Bernhard Gíslason komu Vesturbæjarliðinu í 0-2 í fyrri hálfleik, en Stólarnir gáfust ekki upp. Mark Magee minnkaði muninn á 70. mínútu og í uppbótartíma jafnaði Loftur Páll Eiríksson metin.

Í gær gerðu HK og Haukar 1-1 jafntefli í Kórnum.

Úrslit 2. umferðar:

Leiknir R. 2-0 BÍ/Bolungarvík

Þróttur R. 3-1 KA

Grindavík 3-2 ÍA

Víkingur Ó. 0-1 Selfoss

Tindastóll 2-2 KV

HK 1-1 Haukar