Dagur segir að orð hans hafi verið rangtúlkuð

Dagur B. Eggertsson segir að orð hans í morgunútvarpi Rásar 2 hafi verið rangtúlkuð en orð Dags hafa verið túlkuð á þá leið að hann hafi ekki áhuga á að sitja í minnihluta á næsta kjörtímabili.

„Ég sagði alls ekki að mér hugnaðist ekki að vera í minnihluta,“ segir Dagur B. í samtali við Vísi.

Bæjarfulltrúarnir Dagur B. Eggertsson og Björk Vilhelmsdóttir höfnuðu  í fyrsta og öðru sæti í prófkjöri samfylkingarinnar fyrir borgarstjórnarkosningar í vor um helgina en enginn bauð sig fram gegn þeim. Hjálmar Sveinsson, varaborgarfulltrúi Samfylkingar, varð í þriðja sætinu og Kristín Soffía Jónsdóttir hafnaði í fjórða sætinu.

Fram kom í frétt á vefsíðu RÚV í dag að óvíst væri hvort Dagur B. hefði áhuga á því að sitja næsta kjörtímabil í minnihluta. Dagur var í viðtali í morgunútvarp Rásar 2 í morgun.

Aðspurður hvort að hann muni nenna því aftur að vera í minnihluta svarar Dagur: „Þetta er ekki spurning um nennu. Þetta er meira spurning um að ef ég fæ mjög neikvæð skilaboð í kosningunum að þá hlýt ég að fara yfir það. Við erum ekki í þessu sjálfrar okkar vegna heldur af því að einhver hefur falið okkur umboð til að vinna fyrir þeirra hönd, ef það umboð er mjög veikt þá hlýtur maður að skoða þá stöðu, ef að það umboð er sterkt að þá hlýtur maður að standa undir því,“ sagði Dagur í morgun útvarpinu í morgun.

„Kosningar eru þess eðlis að völdin eru hjá þeim sem kjósa en ekki hjá þeim sem eru í framboði," sagði Dagur í samtali við Vísi.

„Mér finnst einfaldlega eðlilegt að ef maður fær mikinn skell að maður hlusti á þau skilaboð, rétt eins og ef maður fær sterka kosningu þá standi maður undir því. Það sem ég var í raun að segja var að ég mun hlusta á rödd borgarbúa í aðdraganda kosninganna og kosningunum sjálfum.“

Dagur tekur kosningar mjög alvarlega og að þær gefi tóninn fyrir framhaldið.

„Ég mun ekki gera það að einhverjum úrslitakosti hvort ég verði borgarstjóri eða ekki og það var raun spurningin sem ég var að svara í morgunútvarpinu. Ég er hinsvegar til ef borgarbúar eru til. Kosningarnar leggjast mjög vel í mig og ég finn fyrir miklum meðbyr meðal borgarbúa. Ég finn fyrir því að fólk metur þann stöðuleika og festu sem tekist hefur að ná í stjórn borgarinnar. Það vill greinilega ekki fá upp gamla ófriðinn aftur.“