Kokkalandsliðið stefnir hátt

Átján mánaða undirbúningur kokkalandsliðsins er senn á enda og framundan er heimsmeistarakeppnin í matreiðslu.Kokkalandsliðið bauð til hádegisverðar í æfingahúsnæði sínu að Bitruhálsi en á sama tíma var undirritaður samstarfssamningur landsliðsins og bakhjarla þess.

13 kokkar skipa íslenska landsliðið og voru þeir í óðaönn að undirbúa þriggja rétta máltíð fyrir boðsgesti dagsins þegar fréttastofan kíkti inn í eldhús.

„Æfingar hafa staðið yfir í eitt og hálft ár. Mesti tíminn fer í að undirbúa kalda borðið. Við höfum æft fyrir heitu réttina í um hálft ár,“ segir Þráinn Freyr Vigfússon, fyrirliði Kokkalandsliðsins.

Kalda borðið sýndi landsliðið í Smáralind fyrir skemmstu. Það samanstóð að yfir 30 réttum sem verða einungis til sýnis í keppninni. Famsetning og glæsileiki skipta þar mestu máli.

Öðru máli gegnir um heitu réttina þar sem bragðið skiptir höfuðmáli sem og framsetningin. Þeir sem ná hæstu samanlagðri einkunn fyrir kalda borðið og heitu réttina vinnur.

Í grófum dráttum var matseðilinn í dag þannig að í forrétt var hægeldaður þorskur og pönnusteiktur humar, í aðalrétt var grilluð lambamjöðm með lambaskanka- og tungu og í eftirrétt jarðaberja og jógúrtís.

„Þetta er í raun bara matseðillinn, hann mun breytast smávægilega eftir hverja æfingu, þetta er alltaf í einhverri þróun. Svo fáum við líka athugasemdir frá okkar álitsgjöfum.“

Besti árangur kokkalandsliðsins á HM er sjöunda sæti á síðasta móti. Þráinn setur markið hærra núna.

„Við settum okkur hátt takmark sem er topp fimm.“