Nýtt og stærra Barnahús opnað

Nýtt barnahús var formlega opnað í gær í nýjum húsakynnum. Jafnframt var 16 ára afmæli starfseminnar fagnað en Barnahús var stofnað 1. nóvember 1998 með samstarfi barnaverndarnefnda lögreglu, ákæruvalds, Landspítala og Barnaverndarstofu sem annast rekstur hússins.

Á þessum tíma hefur rúmlega 4 þúsund börnum verið vísað í Barnahús en þar fara fram rannsóknarviðtöl, læknisskoðanir, greining og meðferð fyrir börn sem grunur leikur á að hafi sætt kynferðisofbeldi. Um 200 börn koma til viðtals og meðferðar á hverju ári en aldrei hafa komið jafn mörg og í fyrra þegar þau voru í kringum 300.

Bragi Guðbrandsson, forstjóri Barnaverndarstofu, segir það skipta miklu fyrir starfsemina að fá stærra húsnæði. Tveir nýir sérfræðingar hafi bæst í starfshóp hússins en samtals starfa þar sjö sérfræðingar sem sinna þeim málum sem koma á borð Barnahúss.

„Þetta skapar okkur skilyrði til að taka við nýjum viðfangsefnum. Það hafa komið fram óskir um að við veittum börnum áfallameðferð vegna annarra ástæðna en kynferðisofbeldis, til dæmis kynferðisofbeldis og líkamlegs ofbeldis. Hingað til hefur það einvörðungu takmarkast við þau mál sem réttarvörslukerfið hefur haft til meðferðar,“ segir hann.

Í nýja húsinu eru líka fleiri viðtalsherbergi sem eru miðuð að aldri og þroska þeirra barna sem koma til meðferðar.

.

.