Flúði lögreglu en sagðist ekki hafa ekið bílnum

33 ára karlmaður var í Héraðsdómi Reykjaness dæmdur í 75 daga fangelsi fyrir að aka ölvaður sviptur ökurétti og hafa í vörslu sinni fiðrildahníf. Dómur var kveðinn upp í dag.

Maðurinn var handtekinn í mars síðastliðnum eftir að hafa reynt að flýja úr bifreið sem hann hafði ekið norður Reykjavíkurveg í Hafnarfirði. Stöðvaði hann bifreið sína við Snælandsvídeó og reyndi að komast undan á hlaupum en án árangurs. Mældist vínandamagn í blóði yfir mörkum auk þess sem fjaðrahnífur fannst í bílnum.

Fyrir dómi viðurkenndi maðurinn að eiga hnífinn en þvertók fyrir að hafa ekið bílnum. Sagðist hann hafa verið farþegi í bílnum en ekki vilja gefa upp hver ökumaður bílsins væri. Fullyrti hann að lögreglumennirnir tveir sem höfðu hendur í hári hans hefðu ekki mögulega getað staðfest að hann hefði ekið bílnum.

Dómurinn taldi yfir vafa hafið að maðurinn hefði ekið bílnum. Í ljósi þess að hann hefði ítrekað verið tekinn ölvaður undir stýri og sömuleiðis verið sviptur ökuréttindum endurtekið rétt að dæma hann í tveggja og hálfs mánaða fangelsi. Þá var ævilöng ökuréttarsvipting áréttuð og hnífurinn gerður upptækur.