Þjófnaður í Neskirkju: Æskulýðsprestur vill endurheimta tölvuna sína

Séra Sigurvin Lárus Jónsson æskulýðsprestur í Neskirkju lenti í því um helgina að óprúttinn aðili gekk inn í opið skrifstofurými í safnaðarheimili kirkjunnar og hnuplaði þar tölvunni hans. „Það má til sanns vegar færa,“ segir Sigurvin spurður að því hvort það sé ekki ansi langt gengið að fara inn í kirkju og stela munum af presti. „Það var verið að lesa boðorðin tíu í messu á sunnudegi,“ bætir hann við glettinn enda kveður sjöunda boðorðið á um það að ekki skuli stela.

Tölvunni var þó að öllum líkindum stolið á laugardegi en verið var að vinna í kirkjunni þá og rýmið því opið. Sigurvin tekur stuldinn ekki nærri sér en kveðst vilja fá tölvuna aftur vegna þeirra gagna sem í henni eru. „Tölvan er algjörlega verðlaus og af því að viðkomandi tók vitlaust hleðslutæki þá efast ég um að hann geti yfirhöfuð kveikt á henni. Einu verðmætin í þessari tölvu eru tölvupóstur, myndir og vinnugögn,“ útskýrir presturinn. Hann tekur jafnframt fram að það sé ekki einu sinni batterí í tölvunni sem er sautján tommu Macbook pro frá árinu 2006. „Ég vil bara að hún birtist í Neskirkju,“ segir hann en hann hyggst ekki sækja neinn til saka, mestu máli skipti að tölvunni sé skilað.

Öryggismál kirkjunnar verða ekki endurskoðuð vegna atburðarins en Sigurvin segir að þetta sé í fyrsta sinn sem nokkur láti greipar sópa um rými kirkjunnar. „Ég þarf bara að vera varkárari og pakka saman tölvunni minni.“

Sigurvin birti færslu á Facebook þar sem hann biður vinsamlegast um að „garminum“ sé ekki hent en frekar skilað svo lítið beri á.