Sumardvalarstað fyrir fatlaða lokað vegna gruns um gróf kynferðisbrot

Sumardvalarheimili fyrir fatlaða, sem nú er til rannsóknar vegna gruns um gróf kynferðisbrot gegn tveimur fötluðum konum, hefur verið lokað. Þetta kemur fram í frétt hjá RÚV. Konurnar dvöldu á umræddu heimili.

Starfsemin er ekki leyfisskyld en heimilið er í þjónustuumdæmi félagsþjónustunnar í Árborg og nærliggjandi sveitarfélaga.

Maðurinn sem grunaður er tengist rekstraraðila heimilisins fjölskylduböndum en hann neitar sök.

Lögreglan á Selfossi hefur um skeið rannsakað brotin. Konurnar sem um ræðir eru á fertugs og fimmtugsaldri. Þær eru báðar þroskaskertar og önnur með aðra fötlun að auki.