Sumardvalarstað fyrir fatlaða ekki lokað þrátt fyrir grun um gróf kynferðisbrot

Sumardvalarstað fyrir fatlað fólk verður ekki lokað þrátt fyrir að karlmaður sem þar býr sé grunaður um gróf kynferðisbrot gagnvart tveimur fötluðum konum. RÚV greindi frá þessu í kvöldfréttum.

Starfsemin er ekki leyfisskyld en heimilið er í þjónustuumdæmi félagsþjónustunnar í Árborg og nærliggjandi sveitarfélaga. Maðurinn sem grunaður er tengist rekstraraðila heimilisins fjölskylduböndum. Maðurinn neitar sök.

Lögreglan á Selfossi hefur um skeið rannsakað brotin. Konurnar sem um ræðir eru á fertugs og fimmtugsaldri. Þær eru báðar þroskaskertar og önnur með aðra fötlun að auki.

Starfsemin er ekki leyfisskyld en heimilið er í þjónustuumdæmi félagsþjónustunnar í Árborg og nærliggjandi sveitarfélaga. Félagsmálastjórinn þar í bæ hefur ákveðið að senda ekki fólk til dvalar þangað og félagsstjórar annarra sveitarfélaga hafa einnig vitneskju um málið og geta því gripið til sömu ráðstafana.

Fatlað fólk þarf hins vegar ekki atbeina félagsþjónustunnar til að sækja um dvöl á heimilinu en hægt er að sækja um dvöl beint til forráðamanna þess.

Fréttastofa RÚV hefur heimildir fyrir því að forráðamaður þessa sumardvalarheimilis hafi hringt og boðið skjólstæðingum sem dvalið hafa áður á heimilinu dvöl í  sumar, þrátt fyrir rannsókn meintra brota.

Þar sem starfsemi sem þessi er ekki leyfisskyld getur í raun hver sem er boðið upp á sumardvalarþjónustu fyrir fatlað fólk. Engar reglur gilda um mönnun á heimilinu, fagmenntun starfsfólks eða annað sem reglugerð um sumardvalarleyfi fyrir fötluð börn kveður á um.

Velferðarráðuneytið hefur áhyggjur af þessu. Lögfræðingur ráðuneytisins, Rún Knútsdóttir, sagði í fréttum að fyrir lægi að endurskoða félagsþjónustukerfið og þar undir féllu málefni fatlaðs fólks. Það yrði síðan að koma í ljós hvað gert verði varðandi þessa starfssemi.

Í lögum um fatlað fólk segir óheimilt sé að ráða í störf hjá sveitarfélögum, byggðasamlögum, ríki eða einkaaðilum sem unnin eru í þágu þjónustu við fatlað fólk þá sem hafa hlotið refsidóma vegna brota á kynferðisbrotakafla almennra hegningarlaga. Það á við hvort sem þjónustan er veitt á heimili fatlaðs einstaklings, á öðrum heimilum eða stofnunum.

Rún sagði í samtali við Vísi í kvöld að ef um opinberan starfsmann væri að ræða yrði viðkomandi líklega settur í leyfi meðan á rannsókn stæði. Ekkert í núgildandi lögum skyldaði þjónustuaðila sem þesssa til þess að setja viðkomandi í leyfi.