Skattsvik í ferðaþjónustu veruleg

Þrátt fyrir töluverða aukningu á komum ferðamanna til landsins hefur það ekki skilað sér nægjanlega til þjóðarbúsins, þar sem tekjur af hverjum ferðamanni hafa verið að dragast saman ár frá ári, eða um 1000-1500 evrur á hvern ferðamann frá árinu 2004. Í krónum talið er lækkunin um og yfir hundrað þúsund krónur. Þetta kemur fram í nýrri skýrslu Rannsóknarstofnunar atvinnulífsins á Bifröst sem kynnt verður á morgun á fundi Samtaka ferðaþjónustunnar.

Í skýrslunni kemur fram að kortavelta á hvern ferðamann hafi staðið í stað á sama tíma. Ýmissa skýringa var leitað, meðal annars með dvalartíma og samsetningu ferðamanna en skilaði sú leit engum niðurstöðum. Einnig var athugað hvort breytt neyslumynstur þeirra ferðamanna sem hingað koma gæti verið að valda minnkandi tekjum af hverjum ferðamanni.  Því er talið að margt bendi til þess að skattsvik séu veruleg í ferðaþjónustu.

Meðal þess sem fram kom við vinnslu skýrslunnar er mikil ásókn launþega í svartri vinnu. Á það við um til dæmis námsmenn, bótaþega og fólk sem eru í fullri vinnu annars staðar. Talið er að þessi ásókn hafi valdið aðilum í ferðaþjónustu töluverðum vandræðum þar sem framboð á starfsfólki á háannatíma er oft ekki nægjanlegt til að anna eftirspurn.

Í skýrslunni er leitað leiða til að taka á þessu vandamáli, og þær hugmyndir sem nefndar eru, eru til að mynda hækkun á frítekjumörkum námsmanna, leiðir til að auðvelda bótaþegum að taka að sér sumarstörf ásamt heimildum til aukinna framlaga í viðbótarlífeyrissparnað vegna aukavinnu.