Skattsvik í ferðaþjónustu rannsökuð

Rannsóknastofnun Atvinnulífsins - Bifröst vinnur nú að rannsókn á skattalegu umhverfi í ferðaþjónustu með áherslu á umfang skattsvika og leiðir til úrbóta. Rannsóknin hófst í nóvember í fyrra og munu endanlegar niðurstöður liggja fyrir í apríl.

„Rannsóknin fer fram með viðtölum við aðila, söfnun á tölfræðilegum upplýsingum frá aðilum eins og hagstofu, ríkisskattstjóra, rannsóknarmiðstöð verslunarinnar og fleiri aðilum. Við sendum síðan út spurningakönnun á aðila í ferðaþjónustu,“ segir Jón Bjarni Steinsson, sérfræðingur hjá Rannsóknastofnuninni.

Hann segir mikla umræðu um skattsvik og óskráða starfsemi í ferðaþjónustu á Íslandi vera ástæðu rannsóknarinnar og að vandinn fari vaxandi vegna fjölgunar ferðamanna. Gert er ráð fyrir að svipuð þróun haldi áfram.

„Við erum að rannsaka ferðaþjónustu eins og hún leggur sig, en þar sem það er ansi umfangsmikið þá hefur fókusinn frekar verið á leiðir til úrbóta í til dæmis skatta og leyfaumhverfi ferðaþjónustufyrirtækja.“

Almennt gildir fyrir atvinnulífið að þegar skattsvik og óskráð starfsemi kemst upp fyrir ákveðin mörk hefur það verulega röskun í för með sér á innbyrðis samkeppnisstöðu fyrirtækja í viðkomandi atvinnugrein.  Fyrirtæki sem leitast við að fara að öllum leikreglum atvinnulífsins missa samkeppnishæfni sína gagnvart aðilum sem gera það ekki.

„Umræðan um skattsvikin og neðanjarðarhagkerfið í ferðaþjónustunni er svo fyrirferðarmikil að full ástæða er til að gera skipulega rannsókn á málinu.“

Þá telur hann að einföldun og stefnubreyting í skattlagningu og öðru regluverki sem tengist ferðaþjónustu gæti leitt til hagstæðari rekstrarskilyrða fyrir þau fyrirtæki sem koma að ferðaþjónustu á Íslandi. Hann segir mögulegt að flókið kerfi valdi því að skattsvik í greininni séu meiri en þau þyrftu að vera.

Verkefnið er styrkt af Samtökum Atvinnulífsins, Samtökum Ferðaþjónustunnar, Fjármálaráðuneytinu og Atvinnu og Nýsköpunarráðuneyti.

Vilji fólk koma einhverju á framfæri, er hægt að senda póst á ras@bifrost.is