„Það sem ég kveið mest fyrir var að valda fólki vonbrigðum“

Ritstjórn Nýs Lífs hefur valið Anítu Margréti Aradóttur konu ársins 2014.

Aníta tók þátt í þúsund kílómetra kappreið á villtum hestum í Mongólíu en kappreiðin er sú hættulegasta í heimi samkvæmt heimsmetabók Guinness.

„Með framtaki sínu og áræðni hefur Aníta sýnt að allt er hægt ef viljinn er fyrir hendi og kjarki safnað til að takast á við hið óþekkta.

Þetta var hennar sjálfstæða ákvörðun, hennar frumkvæði og hugarþrek sem setur fordæmi fyrir konur á öllum aldri og ekki aðeins hestakonur,“ segir Erna Hreinsdóttir ritstjóri Nýs Lífs í fréttatilkynningu frá tímaritinu sem hefur útnefnt konu ársins frá árinu 1980.

Aníta prýðir einnig forsíðu nýjasta heftist Nýs Lífs og talar um kappreiðina.

„Mongol Derby er það hræðilegasta sem ég hef gert á ævinni en á sama tíma það besta. Það sem ég kveið mest fyrir var að valda fólki vonbrigðum og klára ekki keppnina,“ segir Aníta.

„Ég vissi að margir voru að fylgjast með mér.

Ég ætlaði að pína mig áfram sama hvað gerðist.

Það er slatti af fólki búið að klára þetta með brotin bein og ég ætlaði að gera það líka.

Það er mikil viðurkenning fyrir hestamennskuna að kona ársins, samkvæmt Nýju Lífi, sé hestakona,“ segir Aníta í viðtalinu.