Balotelli með tvö mörk á móti Birki og félögum

Mario Balotelli heldur áfram að raða inn mörkum í ítalska fótboltanum en hann skoraði tvö mörk í kvöld þegar AC Milan vann 4-0 útisigur á Birki Bjarnasyni og félögum hans í Pescara. Mario Balotelli hefur nú skorað 11 mörk í 11 deildarleikjum með AC Milan síðan að liðið fékk hann frá Manchester City í janúarglugganum.

Mario Balotelli skoraði fyrsta mark leiksins á 10. mínútu úr vítaspyrnu og skoraði einnig fjórða markið á 57. mínútu eftir sendingu frá Mathieu Flamini. Mathieu Flamini kom AC Milan í 3-0 á 51. mínútu eftir sendingu frá Robinho sem lagði einnig upp annað markið fyrir Sulley Muntari á 33. mínútu.

Birkir Bjarnason sat allan tímann á bekknum hjá Pescara í þessum leik en liðið er langneðst í deildinn og löngu fallið.

AC Milan er 3 sæti deildarinnar, fjórum stigum á eftir Napoli (2. sæti) og sjö stigum á undan Fiorentina (4. sæti), Napoli og Fiorentina spila bæði seinna í kvöld.

Þetta var í annað skiptið sem Mario Balotelli skorar tvö mörk í sama leiknum með AC Milan en hann hefur skorað að minnsta kosti eitt mark í átta af þeim ellefu deildarleikjum sem hann hefur spilað fyrir félagið.