Kvartað undan ógleði eftir hótelgistinguna

Hópur ferðamanna sem gisti á hóteli í Borgarfirði í júlí kvartaði undan ógleði og höfuðverk eftir nóttina vegna megnrar málningar- og límlyktar í herbergjum í nýrri viðbyggingu.

„Þetta er auðvitað til háborinnar skammar,“ segir Börkur Hrólfsson, leiðsögumaður hópsins. Hann segir þetta bara eitt dæmi af mörgum þar sem pottur sé brotinn hér á landi þegar komi að þjónustu við ferðamenn.

„Það er hart ef Ísland og Íslendingar fara að verða þekkt fyrir að svindla á ferðamönnum,“ segir Börkur um ástandið almennt. Hann segir að það sé því miður að verða raunin, um það hafi hann séð fjölmörg dæmi á þriggja áratuga starfsferli.

Hópurinn kom til næturgistingar og fékk herbergi í nýrri álmu í Icelandair Hótel Hamar í Borgarfirði. Börkur segir að angandi málningarlykt hafi mætt fólkinu og mikil límlykt á salernum. Þá hafi ekki verið búið að setja upp sturtuhengi eða statíf fyrir klósettpappír, og ekkert netsamband hafi verið í herbergjunum. Þá hafi matsalurinn ekki rúmað alla gesti hótelsins.

Sjálfur segist Börkur hafa komið á eftir hópnum um kvöldið, og ekki talað við fólkið fyrr en um morguninn. Sjálfur hafi hann fengið herbergi í eldri álmu hótelsins og þar hafi verið mörg herbergi laus. Engin ástæða hafi verið til þess að hýsa fólkið í nýkláruðu herbergjum. 

Hann segir starfsmenn hótelsins greinilega hafa vitað af lyktinni af flísalíminu og málningunni því öll herbergi sem ekki hafi verið sofið í hafi verið opin upp á gátt og allir gluggar opnir til að lofta út.

„Svona gera menn ekki þegar fólk er búið að borga hátt verð fyrir herbergið,“ segir Börkur. Hann ítrekar að þetta sé aðeins eitt af fjölmörgum dæmum sem fjölmargir leiðsögumenn geti nefnt um fúsk í þjónustu við ferðamenn. Þar skjóti skökku við enda tekjur af ferðamönnum gríðarlega miklar.

„Dálítið orðum aukið“

„Þetta er dálítið mikið orðum aukið,“ segir Sigurður Ólafsson, hótelstjóri á Icelandair Hótel Hamar, spurður um lýsingar leiðsögumannsins á aðstöðu ferðamannanna.

Sigurður segir að hugsanlega hafi vantað sturtuhengi í tvö herbergi. Þá segir hann matsalinn rúma 100 í sæti en 88 geti gist á hótelinu.

„Ég viðurkenni að þetta var nýtt, og það er sjálfsagt einhver málningarlykt í herbergjum sem er nýbúið að mála,“ segir Sigurður. Hann segir að flísalagt hafi verið viku áður en ferðamennirnir hafi komið, og um svipað leyti hafi verið teppalagt.

Spurður hvort límlyktin hafi verið farin þegar herbergin voru leigð út segir Sigurður: „Við skulum orða það þannig að ef þú kaupir þér nýjan bíl er leðurlykt í bílnum þegar þú kemur inn í hann.“