Sjáið markið hans Jóhanns Berg í Kasakstan

Jóhann Berg Guðmundsson var áfram á skotskónum í Evrópudeildinni í fótbolta í dag þegar hann skoraði í 1-1 jafnteflisleik hollenska liðsins AZ Alkmaar og Shakhtyor Karagandy í 3. umferð riðlakeppninnar.

Leikurinn vare á Astana Arena í Astana í Kasakstan og hitastigið var við frostmark. Íslenski landsliðsmaðurinn naut sín hinsvegar í kuldanum og skoraði flott mark í fyrri hálfleik.  

Jóhann Berg jafnaði metin í 1-1 á 26. mínútu eftir að hafa fengið laglega stungusendingu frá hægri bakverðinum Mattias Johansson.

Jóhann Berg átti þarna flott hlaup af miðjunni og smellti boltanum síðan fagmannlega framhjá markverðinum Aleksandr Mokin sem kom út á móti honum.

Það er hægt að sjá markið hans Jóhanns Berg með því að smella hér fyrir ofan.