Villas-Boas virðist ekki kunna tökin á Englandi

Það kom líklega fáum á óvart í gær þegar Tottenham ákvað að reka Andre Villas-Boas sem knattspyrnustjóra félagsins. Hann entist í starfinu í eitt og hálft ár.

Spurs tapaði um helgina 5-0 á heimavelli gegn Liverpool. Það var kornið sem fyllti mælinn hjá stjórn félagsins. Aðeins eru þrjár vikur síðan liðið tapaði 6-0 gegn Man. City.

„Ég mun ekki taka neina ákvörðun um mína framtíð. Ég mun ekki segja upp því ég er baráttumaður,“ sagði Villas-Boas eftir tapið gegn Liverpool.

Gengi liðsins hefur verið undir væntingum í vetur, en liðinu gengið afar illa að skora. Spurs hefur aðeins skorað fimmtán mörk í sextán deildarleikjum.

Portúgalanum hefur ekki gengið vel í ensku úrvalsdeildinni. Hann var ráðinn til Chelsea árið 2011 en rekinn einu ári síðar.

Hafnaði PSG og Real

Tímabilið í fyrra var aftur á móti gott hjá Tottenham. Liðið fékk 72 stig sem venjulega dugar í Meistaradeildarsæti en ekki í fyrra. Stjórinn sagði svo í sumar að hann hefði hafnað tilboðum frá bæði PSG og Real Madrid. Hann vildi vera áfram hjá Tottenham.

Spurs seldi Gareth Bale í lok sumars og keypti fjölda leikmanna fyrir þann pening. Ekki hefur gengið sem skyldi að búa til nýtt lið. Þó svo að þessi aðgerð hafi ekki komið á óvart þá hafa margir gagnrýnt hana. Þar á meðal Gary Neville sem segir það taka meiri tíma að byggja nýtt lið en Villas-Boas hafi fengið.

Eðlilega er þegar farið að spá í hver muni taka við af brottrekna stjóranum. Nöfn Fabio Capello, landsliðsþjálfara Rússlands, Michaels Laudrup, stjóra Swansea, og Glenn Hoddle, fyrrum leikmanns liðsins, eru þegar komin á borðið og fleiri nöfn eiga klárlega eftir að koma fram á næstunni.

André Villas-Boas rekinn í annað skiptið á 22 mánuðum

Síðustu sjö leikirnir með Chelsea

1-1 jafntefli við Swansea

3-3 jafntefli við Manchester United

0-2 tap fyrir Everton

1-1 jafntefli við Birmingham (bikar)

1-3 tap fyrir Napoli (Meistaradeild)

3-0 sigur á Bolton

0-1 tap fyrir West Bromwich Albion

Rekinn 4. mars 2012

Endirinn í ensku úrvalsdeildinni:

5 síðustu leikirnir: 5 stig, markatala: 7-7



Síðustu sjö leikirnir með Tottenham

0-6 tap fyrir Manchester City

2-0 sigur á Tromsö (Evrópudeild)

2-2 jafntefli við Manchester United

2-1 sigur á Fulham

2-1 sigur á Sunderland

4-1 sigur á Anzhi (Evrópudeild)

0-5 tap fyrir Liverpool



Rekinn 16. desember 2013

Endirinn í ensku úrvalsdeildinni:

5 síðustu leikirnir: 7 stig, markatala: 6-15