Ráðherra vill bjóða styttra leikskólakennaranám

„Það er augljóst að við þurfum að endurskoða kerfið,“ segir Illugi Gunnarsson menntamálaráðherra um skort á faglærðum leikskólakennurum.

Í erindi Ingvars Sigurgeirssonar, prófessors við kennaradeild Háskóla Íslands, á skólaþingi sveitarfélaga í gær kom fram að 1.300 faglærða leikskólakennara vanti í leikskóla landsins. Eingöngu ellefu brautskráist næsta vor. Aðeins 90 hafa innritast í námið á síðustu þremur árum miðað við 205 þrjú ár þar á undan. Námið var lengt úr þremur árum í fimm árið 2008. Launin hafa þó lítið hækkað.

„Það sem fer hvað mest í taugarnar á mér í þessu máli öllu er hversu margir yppa öxlum yfir þessari stöðu. Mér er gjörsamlega ómögulegt að skilja þetta andvaraleysi,“ sagði Ingvar á þinginu.

Í samtali við Fréttablaðið bendir Ingvar þó á að aðsóknin sé byrjuð að glæðast á ný. „En hvers vegna ættir þú að eyða fimm árum ef það gefur ekki meira til þess að hafa að bíta og brenna?“ spyr hann.

Illugi Gunnarsson segir að fjölga þurfi námsleiðum fyrir leikskólakennara og veita ákveðin starfsréttindi að loknu þriggja ára námi og jafnvel fyrr. Ingvar tekur undir að lausn geti falist í þriggja ára námi sem gefi réttindi sem aðstoðarleikskólakennari.

Haraldur Freyr Gíslason, formaður Félags leikskólakennara, telur svarið ekki að minnka námskröfur. „Við teljum þetta vera tímabundið ástand. Aðsókn í námið hefur aukist um fimmtíu prósent undanfarin tvö ár. En til að sporna við þessari þróun er nauðsynlegt að hækka launin.“