Skrítið að vera kominn hinum megin borðsins

„Mér bauðst að taka við leikstjóradeildinni við Den Danske Filmskole og eftir nokkra umhugsun ákvað ég að slá til. Fjölskyldan var líka til í smá tilbreytingu. Þetta er vissulega krefjandi og ábyrgðarmikið starf og ég upplifi það sem heiður að vera treyst fyrir því,“ segir leikstjórinn Dagur Kári Pétursson, sem er fluttur til Danmerkur ásamt fjölskyldu sinni og hefur tekið við leikstjóradeild hins virta skóla Den Danske Filmskole.

Orðinn einn af kennurunum

Dagur Kári stundaði áður leikstjóranám við skólann og viðurkennir að það sé óneitanlega skrítin tilfinning að vera kominn aftur og í þetta sinn sem kennari. „Þetta er frábær skóli og ég kunni ótrúlega vel við mig. Það er samt óneitanlega skrítin tilfinning að vera kominn hinum megin borðsins. Margir af mínum gömlu kennurum eru hérna enn og það tekur smá tíma að venjast því að maður er orðinn einn af þeim. Þegar ég byrjaði stóð ég í þeirri trú að ég væri algert unglamb, en komst fljótt að því að í augum nemendanna er ég bara miðaldra kennari,“ segir leikstjórinn, sem reiknar síður með því að ílengjast í Danmörku. „Ég gerði reynslusamning til eins árs. Ég reikna síður með að vera þarna í fullu starfi lengur en það, því mín bíða ótal verkefni sem ég þarf líka að sinna. En ef þetta gengur vel væri gaman að hafa ítök þarna til langframa. En það verður alltsaman að koma í ljós.“

Elsa María Jokobsdóttir er ein af sex nemendum sem teknir voru inn í leikstjóranámið við skólann og mun hún því sitja tímana hjá Degi Kára. „Hún byrjar núna í haust og hún verður því nemandi minn.“

Leggur lokahönd á Fúsa

Dagur Kári er að leggja lokahönd á næstu kvikmynd sína um þessar mundir. Myndin ber titilinn Fúsi og fjallar um fertugan mann sem býr enn hjá móður sinni. Gunnar Jónsson fer með aðalhlutverkið.

„Við erum ennþá að klippa myndina og enn á eftir að taka nokkrar senur, en þetta er allt að mótast og lítur bara mjög vel út. Ég hlakka sérstaklega til að sýna Gunnar  í stóru dramatísku aðalhlutverki. Mér finnst frammistaða hans í þessari mynd vera alveg frábær," segir hann að lokum.