"Ég á mjög auðvelt með að hlæja að sjálfri mér"

Ólöf Hugrún Valdimarsdóttir leikkona var spurð spjörunum úr þessa vikuna en hún á það til að taka tilfinningaþrunginn túlkunardans í eldhúsinu heima hjá sér. 

Nafn? Ólöf Hugrún Valdimarsdóttir

Aldur? 30

Starf? Leikkona

Hvern faðmaðir þú síðast?

Mamma fékk gott kram að kveðjuskyni síðast þegar ég heimsótti hana. 



En kysstir?

Myndarmann.

Hver kom þér síðast á óvart og hvernig?

Ég sjálf fyrir að standa einstaklega vel með sjálfri mér í sérstökum aðstæðum nýlega.

Hvaða galla í eigin fari ertu búin að umbera allt of lengi?

Ég á það til að vera á síðustu stundu þegar ég þarf að mæta eitthvert. Ég er sjúklega áreiðanleg þegar kemur að vinnu og verkefnum sem ég tek að mér en þetta er eitthvað sem vissulega mætti betur fara.

Ertu hörundsár?

Yfirleitt ekki. Ég á mjög auðvelt með að hlæja að sjálfri mér. Og öðrum líka. Það má.

Dansarðu þegar enginn sér til?

Já, oft. Ég á það til að taka tilfinningaþrunginn túlkunardans og önnur vel valin spor í eldhúsinu heima við góða tónlist. En svo dansa ég líka alveg innan um annað fólk, þó það nú væri!

Hringirðu stundum í vælubílinn?

Ég var með vælubílinn á hraðvali síðustu helgi í svona klukkutíma en svo bað vinkona mín mig um að gjöra svo vel og hætta þessu, ég mætti væla þangað til við værum búnar að skila af okkur bílnum mínum og svo yrði farið niður í bæ og dansað. Ég hlýddi og það var geðveikt gaman.

Tekurðu strætó?

Ekki að staðaldri. Ég er oft í mörgum verkefnum hér og þar um bæinn þannig að á meðan drossían mín leyfir þá keyri ég.

Ferðu hjá þér þegar þú hittir fræga eða heilsarðu þeim?

Ég hef aldrei orðið jafn spennt og þegar ég rakst á Sabra Johnson, sigurvegara So You Think You Can Dance árið 2007, á Laugaveginum. Ég hljóp upp að henni, umlaði eitthvað um hvað hún væri frábær, fór í kleinu og fékk svo vinkonu mína til að taka mynd af okkur saman. Good times.

Lumarðu á einhverju sem fáir vinir þínir vita um þig?

Einu sinni vissu ekki svo margir að ég væri með misstóra fætur. Núna vita það mjög margir. En já, ég get hreyft vinstra eyrað. Ekki bæði, bara það vinstra.

Hvað ætlarðu alls ekki að gera um helgina?

Vera í fýlu.