Magnús: Við ætlum að skoða Ondo næstu daga

Gilles Mband Ondo er til skoðunar hjá Val um þessar mundir en leikmaðurinn kom til landsins í gær.

Ondo kemur frá Gabon en hann er kunnugur hér á landi. Hann lék með Grindavík á árunum 2008-2010 þar sem hann skoraði 28 mörk fyrir félagið. Ondo varð markakóngur Pepsi-deildarinnar árið 2010 en það tímabil skoraði hann 14 mörk.

„Við ætlum að skoða Ondo næstu daga,“ segir Magnús Gylfason, þjálfari Vals, í samtali við Fréttablaðið í gær.

„Hann mun æfa með okkur í kvöld en í raun hef ég ekki hugmynd um það í hvernig standi leikmaðurinn er, ætla bara að byrja á því að skoða hans frammistöðu á æfingum.“

Valsmenn skoða núna ákveðna möguleika með framherjastöðuna en Björgólfur Takefusa hefur ekki náð sér á strik í sumar, þrátt fyrir að hafa fengið töluvert margar mínútur inni á vellinum.

„Við erum að skoða málin og eins og alltaf lítur maður í kringum sig. Við erum að öllum líkindum að missa Bjögga [Björgólf Takefusa] úr hópnum og því þurfum við liðsstyrk.“