Dregið í riðla fyrir HM í dag

„Við berum virðingu fyrir öllum en óttumst engan,“ sagði Roy Hodgson, þjálfari enska landsliðsins, spurður hvort hann óttist mögulega andstæðinga sína á HM í Brasilíu næsta sumar. Dregið verður í riðla síðdegis í dag.

Ákvörðun Alþjóðaknattspyrnusambandsins, FIFA, um að færa eina Evrópuþjóð á milli styrkleikaflokka hefur vakið furðu margra, sérstaklega í Evrópu, þar sem sú þjóð mun lenda í riðli með suður-amerísku liði úr efsta styrkleikaflokki sem og öðru evrópsku liði.

„Við erum fyrst og fremst bara ánægðir að hafa komist svo langt í keppninni. Við munum taka þeim riðli sem bíður okkar, hvort sem hann verður talinn sterkur eða ekki,“ bætti Hodgson við.

Cristiano Ronaldo, einn besti knattspyrnumaður heims og lykilmaður í liði Portúgals, vill fyrst og fremst forðast þrjú lið í dag. „Brasilíu, Spán og Þýskaland, Þau eru sigurstranglegustu liðin í keppninni,“ sagði Ronaldo. „Við munum sjá hvaða niðurstöðu við fáum. Við erum með sjálfstraustið í lagi, í góðu formi og náðum okkar markmiðum um að komast til Brasilíu.“

Þetta er í fimmta skiptið sem úrslitakeppni HM fer fram í Suður-Ameríku en í hin fjögur skiptin hefur suður-amerísk þjóð ávallt borið sigur úr býtum. Spánn er sem kunnugt er ríkjandi meistari.

Það eina sem er ákveðið fyrir dráttinn í dag er að heimamenn í Brasilíu verða í A-riðli og spila opnunarleik sinn 12. júní klukkan 20.00 í Sao Paulo. Leikið verður í alls tólf borgum í Brasilíu en úrslitaleikurinn fer svo fram á Maracana-leikvanginum í Rio de Janeiro 13. júlí.

Svona er raðað í styrkleikaflokka:

32 lið taka þátt í úrslitakeppni heimsmeistarakeppninnar í knattspyrnu sem haldin verður í Brasilíu í sumar. Liðunum hefur verið skipt í fjóra styrkleikaflokka. Sjö bestu liðin eru í efsta flokknum ásamt gestgjöfunum sem er ávallt raðað sjálfkrafa í efsta flokk.

Hinum þjóðunum er raðað í þrjá flokka eftir heimsálfum. Afríka og Suður-Ameríka eru í einum flokki, Asía og Norður-Ameríka í þriðja og Evrópa í fjórða flokki.

Notast er við styrkleikalista FIFA til að raða í efsta flokkinn og af þrettán Evrópuþjóðum komust aðeins fjórar í hóp þeirra bestu. Það þýðir að níu þeirra sitja eftir í fjórða flokknum.

Til að jafnmargar þjóðir verða í flokkunum fjórum hefst drátturinn í dag á því að ein Evrópuþjóð verður færð í annan styrkleikaflokk og verður þar ásamt liðum frá Afríku og Suður-Ameríku.

Það verður hins vegar séð til þess í drættinum í dag að þrjú Evrópulið dragist ekki saman í riðil með sérstökum hliðarpotti. Í hann fara fjórar Suður-Ameríkuþjóðir úr efsta styrkleikaflokki og það lið sem verður dregið úr honum verður í riðli með Evrópuþjóðinni úr flokki 2.

Það verður einnig séð til þess að Suður-Ameríkuþjóðir úr fyrsta og öðrum flokki dragist ekki saman í riðil.