Hef enn trú á liðinu okkar

„Við spiluðum fínan varnarleik en við sköpuðum ekki mikið í sókninni. Varnarleikurinn var betri en oft áður og agaður. Það var jákvætt en við vorum mikið í eltingarleik,“ sagði Sigurður Ragnar Eyjólfsson, landsliðsþjálfari kvennalandsliðsins, eftir 2-0 tapið gegn Dönum í Viborg í gær.

Næsta verkefni hjá landsliðsþjálfaranum er að velja 23 manna hóp fyrir EM sem hefst 11. júlí. Sigurður segist nánast vera búinn að velja hópinn en að hann sé enn að velta einu sæti fyrir sér.

Gengi liðsins í ár hefur verið lélegt. Einn sigur, sex töp og markatalan 7-18.

„Við tókum þá ákvörðun að mæta sterkum liðum í undirbúningnum. Við áttum samt von á því að standa okkur betur en þetta. Okkur hefur tekist að vinna þessi lið á síðustu árum. Ég varð fyrir vonbrigðum með formið á leikmönnum fyrr í ár og svo höfum við verið að missa menn í meiðsli. Það hefur eðlilega haft áhrif á undirbúninginn hjá okkur,“ sagði Sigurður Ragnar.

„Ég hef enn trú á liðinu okkar. Við höfum mætt Noregi oft á síðustu árum og við getum unnið þær. Sama með Holland en róðurinn verður þungur gegn Þjóðverjum. Möguleiki okkar á EM liggur í leikjunum gegn Noregi og Hollandi.“

Hefur þjálfarinn ekkert áhyggjur af sjálfstrausti leikmanna eftir þetta slaka gengi í ár?

„Þetta gengi getur eðlilega haft áhrif á sjálfstraustið. Það má kannski deila um hvort það hafi verið rétt að velja svona sterka andstæðinga í undirbúningnum en það var sú leið sem við völdum að fara og við verðum að standa með því.

Vináttuleikir blekkja líka svolítið því þá er verið að skoða leikmenn og skipta meira en gengur og gerist. Auðvitað hefðum við samt viljað gera betur og koma með meira sjálfstraust í mótið. Það er nýtt fyrir liðið að lenda í mótlæti eins og núna og það verður þá að koma í ljós úr hverju liðið er gert. Ég bíð spenntur eftir því að sjá það.“

Þjálfarinn verður kominn með allan hópinn þann 2. júlí og þá verður farið að vinna í taktík og öðru sem þarf að skerpa á.

„Þetta er nýtt og spennandi verkefni sem bíður okkar og við verðum að einblína á það en ekki gengið í síðustu leikjum. Þar kemur nýtt tækifæri og við verðum að mæta ákveðnar til leiks. Það er ekkert annað í boði.“