Framsóknarmenn eru ekki nýnasistar

„Það má segja að mér hafi ofboðið þegar farið var að líka framsóknarmönnum við nýnasista," segir Guðlaugur G. Sverrisson, verkefnastjóri hjá úrvinnslusjóði og góður og gegn framsóknarmaður í tuttugu ár, spurður um tilurð pistils sem hann reit og hefur vakið mikla athygli: „Daðrað við að það að hafa áhuga á Íslandi og því sem íslenskt er, umbyggja okkar þekkingu á getu, þá var því snúið uppá okkur og að við værum orðnir þjóðernissinnaðir út frá skilgreiningu á nýnasisma. Fyrir mig þá var botninum náð.“

Guðlaugur vísar þar einkum og sérílagi til skrifa Inga Freys Vilhjálmssonar á DV en Guðlaugur birti í gær pistil á Pressunni undir fyrirsögninni „Eru framsóknarmenn aular?“ – pistill sem hefur vakið mikla athygli og er dreift víða um netið.  Þar segir meðal annars að fjölmiðlum og pistlahöfundum þyki sjálfsagt að gera lítið úr fulltrúum Framsóknarflokksins og  þá á þeim nótum að þeir séu almennti erkiaular: „Þeir gangi fyrir mútum, fyrirgreiðslu, helmingaskiptum, elski kindur meira en sjúklinga, séu á móti framförum, einangrunarsinnar, ómenntaðir, opnir í báða enda, steli fiskinum frá þjóðinni, séu náttúrusóðar og á móti umhverfisráðuneytinu, auðvaldsrónar, Finnur og Halldór, virkjunarsinnar, hækja íhaldsins, landsbyggðarflokkur og þ.a.l. á móti höfuðborginni, kjördæmapotarar og það sem er nýjast, að framsóknarmenn séu þjóðernissinnar líkt og fasistar voru í Evrópu á millistríðsárunum.“

Margir hafa hent þessu á loft og viljað snúa uppá Framsóknarmenn og meina að þarna hafi hann hitt naglann á höfuðið í lýsingu sinni. Einskonar búmerang. „Jájá, það er akkúrat það sem gerist. Þarna sýnir umræðan sínar verstu hliðar. Ég vissi það. Þetta var meðvitað. Þetta snýr þá bara beint að þessu fólki.“

Guðlaugur segir aðalatriðið að stjórnmálaumræðan sé komin langt fram af brúninni. „Fólk gefur sig ekki að þessu lengur, það vill ekki fórna fjölskyldu ... menn sjá af hverju það er. Það er þessi umræða sem gerir að verkum að fólk vill ekki koma til að taka þátt í því að eiga samtal við þjóðina í gegnum stjórnmálin.“ Þar vísar Guðlaugur einkum til athugasemdakerfa netmiðlanna og segir að fjölmiðlar verði að gangast við ábyrgð sinni og hreinsa þar til. Og sérstaklega illt sé þegar fjölmiðlar geri út á að æra óstöðugan.