Dómarar dæmdir í lífstíðarbann

Knattspyrnusamband Evrópu, UEFA, hefur sett tvo dómara í lífstíðarbann fyrir að reyna að hafa áhrif á úrslit leiks í Evrópudeild UEFA.

Þetta er dómarinn Andranik Arsenyan og aðstoðardómarinn Hovhannes Avagyan en þeir koma frá Armeníu.

Þeir hafa viðurkennt að hafa reynt að hafa áhrif á úrslit leiks Inter Turku og Vikingur þann 11. júlí á þessu ári.

UEFA er með kerfi sem fylgist með veðmálum á leiki og verður því vart við ef óeðlilega mikið er veðjað á leiki. Það gerðist í kringum þennan leik og það kom boltanum af stað.

Forráðamenn UEFA fagna því að eftirlitskerfið þeirra sé að skila árangri.