Lögreglustjóri flaggar ekki í hálfa fyrir Mandela

Lögreglustjóri í Suður Karólínu hefur neitað að flagga í hálfa stöng vegna andláts Nelsons Mandela, fyrrverandi forseta Suður Afríku, í síðustu viku.

Barack Obama Bandaríkjaforseti fyrirskipaði að flaggað yrði í hálfa stöng þar til rökkvar á morgun, en Rick Clark, lögreglustjóri í Pickens-sýslu, mun ekki verða við því.

„Það er einfaldlega mín skoðun að það eigi einungis að flagga í hálfa stöng fyrir Bandaríkjamenn sem fært hafa fórnir fyrir landið,“ segir Clark í samtali við WHNS. „Það ætti að flagga í hálfa í sendiráði Bandaríkjanna í Suður Afríku, en ekki hér heima.“

Fánanum var þó flaggað í hálfa um helgina til þess að heiðra minningu lögreglumanns og til þess að minnast árásarinnar á Perluhöfn, en fáninn fór aftur upp á topp í morgun.