Fernanda dregin fjarri hrygningar- og veiðisvæðum

Varðskipið Þór mun draga flutningaskipið Fernöndu eins fjarri hrygningarsvæðum og veiðislóðum og kostur er. Þetta var ákveðið á samráðsfundi Landhelgisgæslunnar, Hafrannsóknarstofnunar, Umhverfisstofnunar og Samgöngustofu.

Eins og fram hefur komið á Vísi í dag var Fernanda flutt í Hafnarfjarðarhöfn snemma í morgun. Talið var að búið væri að slökkva eld um borð í skipinu en svo reyndist ekki vera því hann gaus aftur upp. Um hundrað tonn af olíu er í skipinu og var eldhættan því mikil.

Brugðið var á það ráð að draga Fernöndu aftur á haf út, jafnvel þótt eldur væri enn logandi um borð.   

Á samráðsfundinum var horft til þess að lágmarka áhættu á að skipið sökkvi með hliðsjón af umhverfisvá en fyrst og síðast að tryggja öryggi allra þeirra aðila sem koma að aðgerðinni.

Meðan aðstæður leyfa mun varðskipið Þór draga Fernanda á svæði eins fjarri hrygningarsvæðum og veiðislóðum og kostur er. Þá er einnig markmið að komast á svæði þar sem vindátt er hagstæð miðað við hugsanlegt rek á skipinu ef þörf er á að hætta drætti á því af öryggisástæðum. 

Ef svo fer að skipið sökkvi miðast aðgerðir við að sem minnstar líkur verði á því að olía berist á strönd með tilliti til hafstrauma. Sem stendur er ekki talið óhætt að dæla sjó á Fernanda með tilliti til stöðugleika skipsins.

Fylgst er náið með framvindu mála og staðan endurmetin eftir upplýsingum og aðstæðum hverju sinni. Sem stendur ganga aðgerðir vel og varðskipið Þór siglir á 6 hnúta hraða, að því er segir í tilkynningu.