Tim Roth á að leika Blatter í nýrri mynd um FIFA

Alþjóðaknattspyrnusambandið, FIFA, verður viðfangsefnið í nýrri kvikmynd samkvæmt frétt á Guardian og mun myndin fjalla um sögu FIFA. FIFA hefur gefið grænt ljós á myndina og spilling innan sambandsins verður því örugglega ekki meðal viðfangsefna hennar.

Myndin ætti að koma út í tengslum við Heimsmeistarakeppnina í Brasilíu sem fer fram næsta sumar og við Íslendingar verðum vonandi meðal þátttökuþjóða.

Heimildir Guardian eru að Tim Roth muni leika Sepp Blatter, núverandi forseta FIFA. Tim Roth er þekktastur fyrir að leika í Quentin Tarantino myndunum Reservoir Dogs og Pulp Fiction sem og í sjónvarpsþáttunum Lie to Me.

Það verða fleiri frægir leikarar í þessari mynd og þar á meðal  er Frakkinn Gérard Depardieu sem mun leika landa sinn Jules Rimet. Rimet var forseti FIFA í 33 ár og í aðalhlutverki að koma Heimsmeistarakeppninni af stað á fjórða áratugnum.

Myndin um sögu FIFA hefur fengið vinnuheitið F2014 og verður tekin upp í Aserbaídsjan, Frakklandi og Brasilíu en framleiðslufyrirtækin eru langt frá því að vera þau þekktustu í greininni.